चितवन । भरतपुर–२, क्षेत्रपुरस्थित सिद्धि विनायक बचत तथा ऋण सहकारी संस्था लिमिटेडको १९औँ वार्षिक साधारण सभा बुधबार भरतपुरस्थित चित्रावती लिजर सेन्टरमा सम्पन्न भएको छ ।
साधारण सभाले संस्थाको आगामी कार्यदिशा, वित्तीय अनुशासन र सदस्यकेन्द्रित सेवा प्रवाहलाई थप प्रभावकारी बनाउनेमा जोड दिएको छ ।
संस्थाका अध्यक्ष थिरप्रसाद धितालको सभापतित्व एवम् जिल्ला सहकारी संघ लिमिटेड, चितवनका अध्यक्ष शरदकुमार बर्तौलाको प्रमुख आतिथ्यतामा साधारण सभा सम्पन्न भएको हो ।
कार्यक्रममा बोल्दै प्रमुखअतिथि बर्तौलाले सहकारी संस्थाहरूले पारदर्शीरूपमा सदस्यको हितलाई केन्द्रमा राखेर काम गर्नुपर्ने बताए । उनले सिद्धि विनायक सहकारीले स्थानीयस्तरमा पुर्याएको आर्थिक योगदानको प्रशंसा गर्दै आगामी दिनमा अझ सुरक्षित र व्यवस्थितरूपमा बचत तथा ऋण परिचालनमा ध्यान दिनुपर्नेमा जोड दिए ।
संस्थाका अध्यक्ष धितालले सदस्यहरूको विश्वास, सहभागिता र सहकार्यका आधारमा सिद्धि विनायक सहकारीलाई थप सुदृढ बनाउँदै लैजाने बताए ।
सहकारीको दिगो विकासका लागि सदस्यको आर्थिक हितसँगै संस्थागत सुशासन, पारदर्शिता र उत्तरदायित्वलाई अझ प्रभावकारी बनाउनुपर्नेमा उनले जोड दिए । उनले सदस्यहरूको आवश्यकता र अपेक्षाअनुसार सेवा विस्तार गर्दै सहकारीलाई थप व्यवस्थित, सुरक्षित र सदस्यकेन्द्रित बनाउने प्रतिबद्धता व्यक्त गरे ।
साधारण सभामा संस्थाका सचिव जयराम पाण्डेले वार्षिक प्रगति प्रतिवेदन तथा कोषाध्यक्ष रामप्रसाद घिमिरेले आर्थिक प्रतिवेदन प्रस्तुत गरेका थिए । उपाध्यक्ष मुकुन्दप्रसाद गौतमले स्वागत मन्तव्य दिएका थिए ।
कार्यक्रममा उत्कृष्ट बचतकर्ता, असल ऋणी, महिला बचतकर्ता, असल बाल बचत तथा उत्कृष्ट कर्मचारीलाई सम्मानित गरिएको थियो ।
कार्यक्रममा सहकारीका संस्थापक अध्यक्ष तथा सल्लाहकार शालिकराम घिमिरे, कानुनी सल्लाहकार वरिष्ठ अधिवक्ता जगन्नाथ भण्डारी तथा सल्लाहकार भगवती पाण्डेलगायतको विशेष उपस्थिति रहेको थियो ।
यस्तै, साधारण सभामा लेखा तथा सुपरीवेक्षण समिति संयोजक विनोद पौडेल, उपाध्यक्ष मुकुन्दप्रसाद गौतम, सचिव जयराम पाण्डे, कोषाध्यक्ष रामप्रसाद घिमिरे, सहसचिव संगीता गौतम तथा सञ्चालक समिति सदस्यहरू इन्दिरा पन्त लामिछाने, शम्भु अधिकारी, कृष्णप्रसाद सिलवाल, सीता सापकोटा, नवराज अर्याल, हरिप्रसाद रिमाल, व्यवस्थापक विकास पौडेल तथा शेयर सदस्यहरूको सहभागिता रहेको थियो ।
विसं २०६५ सालमा स्थापित सो संस्थामा हाल २ हजार १२१ सदस्य रहेका छन् ।
भरतपुर । नेपाली कांग्रेस भरतपुर महानगरको सभापतिमा बुद्धिकान्त न्यौपाने निर्वाचित भएका छन् ।
बुधबार भएको निर्वाचनको परिणामअनुसार १२३२ मत खसेको थियो । न्यौपानेले ६६० मत ल्याएर विजयी भएका हुन् । उनका निकटतम प्रतिष्पर्धी ज्योतिप्रसाद कँडेलले ४१३ मत ल्याए भने अर्का प्रतिष्पर्धी कृष्णविलास अधिकारीले १५९ मत ल्याए ।
उपसभापतिमा मित्रनिधि तिवारी बिजयी भएका छन् । उनले ७१५ मत ल्याए । उनका प्रतिष्पर्धी रेशमबहादुर देउजाले ४७७ मत ल्याए । सचिवमा युवा उमेदवार सुमित पराजुलीले ७८१ मत ल्याएर विजयी भएका छन् । उनका प्रतिष्पर्धी रामजी पौडेलले ४३६ मत ल्याए ।
अधिवेशनबाट महिलातर्फको उपाध्यक्षमा कल्पना पौडेल खड्का र सहसचिवमा देउबहादुर थापा निर्विरोध निर्वाचित भएका छन् । त्यस्तै, ४३ जना कार्यसमिति सदस्य पनि निर्विरोध निर्वाचित भएको मतदान अधिकृत रामेश्वर पौडेलले जानकारी दिए ।
राप्ती । नेपाली कांग्रेसको १५औँ महाधिवेशनअन्तर्गत राप्ती नगरपालिकाको नगर अधिवेशनले सर्वसम्मत नेतृत्व चयन गरेको छ ।
नगर सभापतिका आकांक्षीहरूबीच सहमति जुटाउन निवर्तमान नगर सभापति देवेन्द्र लामाले गरेको पहलपछि चूडाप्रसाद सिलवाल (भीमसेन) नगर सभापतिमा सर्वसम्मत चयन भएका हुन् ।
सिलवाल यसअघि कांग्रेस राप्ती–८ का वडा सभापति थिए । नगर सभापतिका आकांक्षीहरूबीच प्रतिस्पर्धाको अवस्था देखिएपछि लामाले सहमति र एकताका लागि पहल गरेका थिए ।
चितवनका सात स्थानीय तहमध्ये राप्तीमा नगर सभापति सर्वसम्मत चयन हुनुलाई कांग्रेसभित्रको आन्तरिक एकताको प्रयासका रूपमा लिइएको छ । लामाले आफ्नो कार्यकालमा पनि पार्टीभित्र सहमति र समन्वयमा जोड दिँदै आएका थिए ।
कालिका । नेपाली कांग्रेसको १५औँ महाधिवेशनअन्तर्गत चितवन क्षेत्र नं २ मा पर्ने कालिका नगरपालिकाको नगर अधिवेशनबाट रमेशजङ्ग थापा नगर सभापतिमा विजयी भएका छन् ।
नगर सभापति पदका लागि भएको निर्वाचनमा कुल २८४ मत खसेको थियो । प्राप्त मत परिणामअनुसार रमेशजङ्ग थापाले १९३ मत प्राप्त गर्दै विजयी भएका हुन् । उनका प्रतिस्पर्धी आत्माराम बास्तोलाले ७६ मत प्राप्त गरेका छन् ।
मत परिणाम सार्वजनिक भएसँगै थापा नेपाली कांग्रेस कालिका नगर कार्यसमितिको नयाँ सभापतिमा निर्वाचित भएका हुन् ।
खैरहनी । नेपाली कांग्रेस खैरहनी नगरसभापतिमा शंकर कँडेल विजयी भएका छन् । नगर सभापतिका लागि भएको निर्वाचनमा कँडेलले १९९ मत प्राप्त गर्दै विजयी भएका हुन् । उनका प्रतिस्पर्धी अनुप अधिकारीले १७६ मत प्राप्त गरे ।
यसैगरी, नगर उपसभापति (खुला) मा चन्द्रकान्त छत्कुली १९४ मत प्राप्त गर्दै विजयी भएका छन् । उनका प्रतिस्पर्धी दीपकप्रसाद खरेलले १७४ मत प्राप्त गरे ।
महिला उपसभापतिमा मिरा चौधरीले २३१ मत प्राप्त गर्दै विजयी हुँदा रेनुका चौधरीले १४१ मत प्राप्त गरिन् ।
नगर सचिवमा उज्ज्वल बर्तौता १८७ मतसहित विजयी भएका छन् । उनका प्रतिस्पर्धी नवराज न्यौपाने (हिमाल)ले १७७ मत प्राप्त गरे ।
यस्तै, सहसचिवमा विक्रम चौधरी २०४ मतसहित विजयी भएका छन् । उनका प्रतिस्पर्धी दीपक नहर्कीले १६५ मत प्राप्त गरे ।
रत्ननगर । नेपाली कांग्रेस रत्ननगरको नगर सभापतिमा युवा नेता उमेश गिरी विजयी भएका छन् ।
पार्टीको १५औँ महाधिवेशनअन्तर्गत बुधबार सम्पन्न निर्वाचनमा रामहरि न्यौपानेलाई पराजित गर्दै गिरी नगर सभापतिका निर्वाचित भएका हुन् । गिरीले जितका लागि २९५ मत प्राप्त गर्दा न्यौपाने १९४ पाए ।
यस्तै, उपसभापतिमा हरि लामिछाने ३१९ प्राप्त गरी विजयी भएका छन् । उनका प्रतिद्वन्द्वी नारायण महतोले १८३ मत प्राप्त गरेका छन् ।
महिला उपसभापतिमा सरस्वती चालिसे २६८ मतका साथ विजयी भएकी छन् । उनकी निकटतम् प्रतिद्वन्द्वी रिता काप्रीले २२५ मत प्राप्त गरिन् । सचिवमा सुरेशजङ्ग पाण्डे २५६ मतका साथ विजयी हुँदा निकटतम प्रतिद्वन्द्वी सुवर्ण घिमिरेले २४५ मत पाएका छन् ।
सहसचिवमा मिलनकुमार क्षेत्री २६९ मतका साथ विजयी भएका छन् । उनका निकटतम प्रतिद्वन्द्वी पुरुषोत्तम लामिछानेले २३० मत प्राप्त गरेका छन् ।
