रत्ननगर । रत्ननगर नगरपालिका स्वास्थ्य शाखाको आयोजनामा भदौ महिनाको मासिक समीक्षा तथा प्रगति विवरणबारे बिहीबार छलफल तथा अन्तर्क्रिया कार्यक्रम सम्पन्न भएको छ ।
निमित्त प्रमुख प्रशासकीय अधिकृत नगर शिक्षा अधिकारी नारायणप्रसाद वाग्लेको प्रमुख आतिथ्यता रहेको कार्यक्रममा १६ वटै वडाका आधारभूत स्वास्थ्यकेन्द्र प्रमुख तथा स्वास्थ्यचौकी प्रमुखहरुले आआफ्नो वडामा भए/गरेका स्वास्थ्यसम्बन्धी अद्यावधिक विवरण प्रस्तुत गरेका थिए ।
सो अवसरमा सामाजिक विकास समितिका संयोजक सोहेन्द्रराज खरेलले स्वास्थ्यसम्बन्धी प्रगति विवरण समयमै अद्यावधिक गर्न र नगरवासीलाई उत्कृष्ट सेवा प्रवाह गर्न स्वास्थ्यकर्मीहरुलाई सुझाव दिए । उनले स्वास्थ्यकर्मी साथीहरुको लगाव, क्षमता र अनुभवका कारण स्वास्थ्य क्षेत्रमा रत्ननगरको नतिजा राम्रो रहेको र आगामी दिनमा पनि आपसी सहयोग र राय लिई स्वास्थ्यसेवाका सूचकहरु अद्यावधिक गर्न आग्रह गरे ।
स्वास्थ्य शाखा प्रमुख एवं जनस्वास्थ्य अधिकृत माधवप्रसाद पौडेलले स्वास्थ्यकर्मीहरुले प्रस्तुत गरेको प्रगति विवरणबारे समीक्षा गर्दै कमीकमजोरी सुधार गरी अगाडि बढ्न सबै स्वास्थ्यकर्मीहरुमा आग्रह गरे ।
उनले आर्थिक वर्ष २०८२/०८३ को पालिकास्तरीय स्वास्थ्य कार्यक्रमको वार्षिक समीक्षा गोष्ठीको मूल्याङ्कनअनुसार बछौली स्वास्थ्यचौकी स्वास्थ्यसम्बन्धी कार्यक्रमहरुको कार्यान्वयनमा उत्कृष्ट प्रदर्शन गर्दै प्रथम भएको घोषणा गरे । सो अवसरमा बछौली स्वास्थ्यचौकीका इन्चार्ज केशवबाबु पौडेललाई सम्मानपत्र प्रदान गरिएको थियो ।
सो अवसरमा जनस्वास्थ्य कार्यालय चितवनका तथ्याङ्क अधिकृत इन्द्रमणि भण्डारीले विभिन्न सूचकका आधारमा रत्ननगर अब्बल रहेको र केही प्वाइन्टका आधारमा मात्रै उत्कृष्ट हुन नसकेको बताए । उनले आगामी दिनमा अझै उत्कृष्ट स्वास्थ्यसेवा गर्न सुझाव दिए । यस्तै, मासिक समीक्षाको विश्लेषण गर्दै स्वास्थ्यकर्मीहरुलाई आपसी सहयोग र समन्वय गरी रजिस्टरमा विवरण अद्यावधिक गर्न सुझाव दिए । उनले स्वास्थ्यकर्मीहरुले प्रस्तुत गरेको प्रगति विवरणमाथि समीक्षा गर्दै आवश्यक सहजीकरण गरेका थिए ।
स्वास्थ्य शाखाकी नर्सिङ इन्चार्ज अम्बिका पौडेलले सञ्चालन गरेको कार्यक्रममा कार्यपालिका सदस्य बबिताकुमारी चौधरी, बछौली स्वास्थ्यचौकी इन्चार्ज केशवबाबु पौडेललगायतले मन्तव्य राखेका थिए ।
