
चितवन । रसुवाको भोटेकोशी नदीमा आएको बाढीमा परि बेपत्ता भएका व्यक्तिहरुको पहिचानका लागि चितवनमा परिवारका सदस्यहरुको डिएनए नमुना सङ्कलन सुरू गरिएको छ ।
जिल्ला प्रहरी कार्यालय चितवनले बागमती प्रदेश जनस्वास्थ्य प्रयोगशाला इकाइ चितवन र जनस्वास्थ्य कार्यालय भरतपुर चितवनको सहकार्यमा डिएनए नमुना सङ्कलन सुरू गरेको हो । भरतपुर महानगरपालिका–१०, स्थित चितवन उद्योग संघको परिसरमा मंगलबारदेखि डिएनए नमुना सङ्कलन सुरू गरिएको हो । नमुना सङ्कलन कार्य बिहान ९ः०० बजेदेखि बेलुकी ५ः०० बजेसम्म चल्ने जिल्ला प्रहरी कार्यालय चितवनका प्रमुख रामेश्वर पौडेलले जानकारी दिए ।
भोटेकोशी नदीमा आएको बाढीको कारणले गर्दा फेला परेका शवहरूको पहिचानको लागि बुबा, आमा, छोरा, छोरीमध्ये कुनै एक जनाबाट डिएनए परीक्षणको लागि नमुना सङ्कलन कार्य भइरहेको छ । त्यसका डिएनए नमुना दिन जाने व्यक्तिहरुले आफ्नो पहिचान खुल्ने कागजात र दुईप्रति पासपोर्ट साइजको फोटोसमेत लिएर जान प्रहरीले अनुरोध गरेको छ ।
यसरी सङ्कलन गरिएको डिएनए नमुनाको रिपोर्ट आउन कम्तीमा १२ साता लाग्ने छ । चितवनमा हालसम्म ३२१ शव फेला परेको छ । जसमध्ये १२ जनाको मात्रै सनाखत भएको छ ।
चितवन । रसुवाको भोटेकोशीमा यही भदौ १० गते आएको अकल्पनीय बाढीले त्रिशूली र नारायणी नदी हुँदै चितवनमा भेटिएका शवमध्ये ३३५ वटा शवको व्यवस्थापन गरिएको छ । तीमध्ये १२९ वटा लिङ्ग पहिचान नभएको जनाइएको छ । सनाखत हुन नसकेका ती शवलाई भरतपुर महानगरपालिका–१ देवघाट जङ्गलमा मङ्गलबार रातिसम्म व्यवस्थापन गरिएको हो ।
जिल्ला प्रहरी कार्यालयका प्रमुख प्रहरी उपरीक्षक रामेश्वर पौडेलका अनुसार हालसम्म भेटिएका ३४८ शवमध्ये ३३५ वटाको व्यवस्थापन गरिएको छ भने १२ वटाको सनाखत भएको छ । एउटाको व्यवस्थापन गर्न बाँकी छ । जिल्लामा शव व्यवस्थापन गर्न कठिन भएपछि डिएनए सङ्कलन गरेर शनिबारदेखि जङ्गलमा लगेर खाडलमुनि शव राख्न थालिएको हो ।
प्रहरीले शनिबार ९६ शवको व्यवस्थापन गरेको थियो । आइतबार १०३, सोमबार ८१ र मङ्गलबार ५५ शव व्यवस्थापन गरेको हो । जमिनमुनि व्यवस्थापन गरिएकामध्ये सबैभन्दा बढी लिङ्ग पहिचान नभएका १२९ वटा शव छन् । त्यस्तै पुरुष १०७, महिला ७३, बालिका १५ र बालक ११ जना रहेको प्रहरीले जानकारी दिएको छ ।
शवहरूको डिएनए नमुना सुरक्षित राख्दै जङ्गलमा व्यवस्थापन गरिएको प्रमुख प्रहरी उपरीक्षक पौडेलले बताए । सनाखत भएका शव परीक्षणपछि परिवारले बुझेर लगेका छन् । नदी किनारमा शव फेला पर्ने क्रम जारी छ । नेपाली सेना, नेपाल प्रहरी र सशस्त्र प्रहरीलाई संयुक्तरूपमा खोजी तथा व्यवस्थापनमा परिचालन गरिएको छ ।
शव पहिचानका लागि डिएनए नमुना सङ्कलन सुरू
भोटेकोशी नदीमा आएको बाढीपछि फेला परेका शवको पहिचानका लागि चितवनमा डिएनए परीक्षणका लागि आफन्तको नमूना सङ्कलन सुरु गरिएको छ । जिल्ला प्रहरी कार्यालयले बागमती प्रदेश जनस्वास्थ्य प्रयोगशाला, भक्तपुर सेवा इकाइ र जनस्वास्थ्य कार्यालयको सहयोगमा भरतपुर महानगरपालिका–१० स्थित चितवन उद्योग सङ्घको परिसरमा मङ्गलबारदेखि डिएनए नमुना सङ्कलन सुरू गरेको हो ।
जिल्ला प्रहरी कार्यालयका सूचना अधिकारी प्रहरी नायब उपरीक्षक चन्द्रभूषण यादवले बिहान ९ः०० देखि साँझ ५ः०० बजेसम्म नमुना सङ्कलन भइरहेको जानकारी दिए । उनका अनुसार शवसँग पहिलो तहको नाता पर्ने आफन्त अर्थात् बुबा, आमा, छोरा वा छोरीमध्ये कुनै एक जनाको रगतको नमुना डिएनए परीक्षणका लागि सङ्कलन गरिनेछ । उनले डिएनए नमूना दिन आउने व्यक्तिलाई आफ्नो पहिचान खुल्ने आधिकारिक कागजात र दुईप्रति पासपोर्ट आकारका फोटो साथमा ल्याउन अनुरोध गरे ।
डिएनए नमुना सङ्कलन र परीक्षणको प्राविधिक प्रक्रियाबारे जानकारी दिँदै नेपाल प्रहरी विधि विज्ञान प्रयोगशालाका प्रहरी निरीक्षक सन्देशकुमार पोखरेलले हराइरहेका व्यक्तिको पहिचानका लागि शवबाट मुख्य रूपमा दाँत र हड्डीका नमूना सङ्कलन गरिएको बताए । ती नमूनाबाट डिएनए प्रोफाइल तयार गरिन्छ र त्यसलाई आफन्तबाट सङ्कलन गरिएको डिएनएसँग म्याचिङ गरी पहिचान गरिन्छ ।
उनले भने, ‘पहिलो प्राथमिकतामा बुबाआमा वा छोराछोरीको डिएनए नमुना आवश्यक पर्छ । यदि पहिलो तहका आफन्त उपलब्ध नभए दाजुभाइ वा दिदीबहिनीको नमुना प्रयोग गरेर पनि परीक्षण गर्न सकिन्छ ।’
नेपालको प्रयोगशालाको क्षमताका साथै वैदेशिक सहयोगसमेत परिचालन गरेर कम्तीमा १२ हप्ता अर्थात् तीन महिनाभित्र सबै नमुनाको परीक्षण र डिएनए म्याचिङ सम्पन्न गर्ने लक्ष्य राखिएको उनले बताए ।
प्रहरीका अनुसार चितवन बाहिर रहेका आफन्तले पनि आफू बसेको जिल्लाको जिल्ला प्रहरी कार्यालयमा पुगेर डिएनए नमूना दिन सक्ने व्यवस्था गरिएको छ । विदेशमा रहेका आफन्तका लागि पनि डिएनए नमुना उपलब्ध गराउने व्यवस्था मिलाइएको प्रहरीले जनाएको छ । हराइरहेका व्यक्तिका विदेशमा रहेका पहिलो तहका आफन्तले सम्बन्धित देशस्थित नेपाली दूतावास वा कूटनीतिक नियोगमार्फत अथवा नेपाल प्रहरीको आधिकारिक वेबसाइटमार्फत आफ्नो डिएनए प्रोफाइलको ‘सफ्ट कपी’ पठाई परीक्षण प्रक्रियामा सहभागी हुन सक्नेछन् ।
अस्थायी शव भण्डारणस्थलमा दीप प्रज्ज्वलन
शवहरूको व्यवस्थापन गरिएको भरतपुर–१ देवघाटस्थित जङ्गलमा मङ्गलबार साँझ दीप प्रज्ज्वलन गरी श्रद्धाञ्जली अर्पण गरिएको छ । जिल्ला समन्वय समितिका प्रमुख, प्रमुख जिल्ला अधिकारी, सुरक्षा निकायका प्रमुख, अस्पतालका प्रमुख तथा सर्वसाधारणको सहभागिता रहेको थियो । विभिन्न समुदायका नागरिकले पनि दीप प्रज्ज्वलन गरी हालसम्म यहाँ व्यवस्थापन गरिएका ३३८ मृतकप्रति श्रद्धाञ्जली अर्पण गरेका थिए ।
रामजानकी बालिका आश्रम देवघाटका कन्याहरूले गीता पाठ गरी दिवङ्गत आत्माप्रति श्रद्धाञ्जली व्यक्त गरेका थिए । त्यसैगरी विभिन्न धार्मिक समुदायका प्रतिनिधिले पनि कार्यक्रममा सहभागी भई श्रद्धाञ्जली व्यक्त गरेका थिए ।
जिल्ला समन्वय समितिका प्रमुख नारायणप्रसाद अधिकारी, प्रमुख जिल्ला अधिकारी गणेश अर्यालले दीप प्रज्ज्वलन गर्दै दिवङ्गत आत्माप्रति भावपूर्ण श्रद्धाञ्जली व्यक्त गरे । यस स्थान ‘अन्तिम संस्कार’ नभई पहिचान नहुन्जेलका लागि अपनाइएको ‘अस्थायी व्यवस्थापन’ मात्र भएको स्पष्ट पारिएको थियो । यो क्षेत्र १२ वर्षसम्म अस्थायी शवस्थलका रूपमा रहने जनाइएको छ ।
रत्ननगर । रत्ननगरमा शनिबार आयोजित रक्तदान कार्यक्रममा १०३ युनिट रगत सङ्कलन भएको छ । रसुवामा आएको बाढीमा घाइते भएर उपचार गराइरहेका विरामीहरुका लागि आकस्मिक रक्तदान कार्यक्रम गरिएको हो । रत्ननगरका मेयर प्रलाद सापकोटासहित जनप्रतिनिधि र सर्वसाधारणले रक्तदान गरेका थिए ।
ब्लड डोनर्स सोसाइटी रत्ननगर, लायन्स क्लब अफ रत्ननगर पिस, लायन्स क्लब अफ चितवन टाइगर्स, पूर्वी चितवन वितरक संघ र भक्ति भजन नेपालको संयुक्त आयोजना तथा गैरीबारी रिसोर्ट सौराहा, योगदान राष्ट्रका लागि, नेपाल बजार बिक्री प्रतिनिधि संघ, रत्ननगर खानेपानी तथा सरसफाइ उपभोक्ता संस्था, हाम्रो दृष्टि राम्रो दृष्टि, पिठुवा दुग्ध उत्पादक सहकारी संस्था, शान्तिकुञ्ज डेरी उद्योगको सहयोगमा कार्यक्रम गरिएको हो ।
बाढीमा घाइते भएर उपचार गराइरहेका बिरामीहरुका लागि हुन सक्ने रगतको अभावलाई मध्यनजर गरी कार्यक्रम आयोजना गरिएको ब्लड डोनर्स सोसाइटी रत्ननगरका अध्यक्ष शिवप्रसाद रेग्मीले जानकारी दिए । कार्यक्रममा योगदान राष्ट्रका लागि नामक सामाजिक संस्थामा आबद्ध २१ जनाले रक्तदान गरेका छन् ।
चितवन । गीतकार रिमा श्रेष्ठ नेपाली सांगीतिक क्षेत्रमा निरन्तर सिर्जनशील यात्रामा सक्रिय नाम हुन्। प्रवासको व्यस्त जीवनका बीच पनि उनले कला, साहित्य र संगीतप्रतिको आफ्नो प्रेमलाई कहिल्यै ओझेल पर्न दिएकी छैनन्। पेशाले आईटी इन्जिनियर रहेकी श्रेष्ठ आफ्ना सिर्जनामार्फत नेपाली भाषा, कला, संस्कृति र संगीतसँग निरन्तर जोडिँदै आएकी छन्।
उनले आफ्ना सिर्जनाहरू ‘रिमा श्रेष्ठ वर्ल्ड’ नामक युट्युब च्यानलमार्फत सार्वजनिक गर्दै आएकी छन्। प्रवासमा रहेर पनि नेपाली भाषा, कला, संस्कृति तथा मौलिक भेषभूषाप्रतिको उनको माया र सम्मान उत्तिकै प्रगाढ देखिन्छ। नेपाली पहिचान र संस्कृतिको संरक्षण तथा प्रवर्द्धन गर्ने उनको प्रयास गीत–संगीतमा मात्र सीमित छैन, सामाजिक तथा सांस्कृतिक गतिविधिमा समेत उनको सक्रियता देखिन्छ।
हालै गीतकार रिमा श्रेष्ठले जेन–जी आन्दोलनमा आफ्नो ज्यान गुमाएका सपुतहरूप्रति श्रद्धाञ्जली अर्पण गर्दै देशभक्तिपूर्ण गीत ‘देशको शान’ सार्वजनिक गरेकी छन्। उक्त गीतमार्फत जेन–जी पुस्ताले देशमा आमूल परिवर्तनका लागि दिएको योगदान, त्याग र बलिदानलाई उनले भावनात्मक शब्दमार्फत प्रस्तुत गरेकी छन्।
‘देशको शान’ गीतमा सनिश श्रेष्ठले स्वर दिएका छन् भने दिनेश श्रेष्ठले संगीत संयोजन गरेका छन्। गीतको कम्पोजिसन कल्याण सिंहको रहेको छ। गीतको रेकर्डिङ डी स्टुडियोमा गरिएको हो। यसरी गीतकार रिमा श्रेष्ठको सिर्जनालाई सनिश श्रेष्ठ, दिनेश श्रेष्ठ र कल्याण सिंहले आ–आफ्नो भूमिकामार्फत सशक्त साथ दिएका छन्।
गीतको म्युजिक भिडियोमा रोहन श्रेष्ठको अभिनय रहेको छ। भिडियोको छायांकन युनिक कोइरालाले गरेका छन् भने सम्पादन विकास दाहालको रहेको छ। चर्चित म्युजिक भिडियो निर्देशक सोनाम पाख्रिनले भिडियोको निर्देशन गरेका छन्। यस गीतका निर्माता कुशल गुरुङ हुन्।
देशप्रेम, परिवर्तनको चाहना, त्याग र बलिदानको भावलाई केन्द्रमा राखिएको ‘देशको शान’ ले गीत तथा म्युजिक भिडियोमार्फत नेपाली युवापुस्ताको भावना र देशप्रतिको जिम्मेवारीलाई प्रस्तुत गर्ने प्रयास गरेको छ। विशेषगरी जेन–जी पुस्ताले उठाएको परिवर्तनको आवाज र त्यस क्रममा भएको त्याग तथा बलिदानलाई गीतले भावनात्मक रूपमा उजागर गरेको छ।
प्रवासमा रहेर पनि मातृभूमि, नेपाली समाज र समसामयिक विषयसँग भावनात्मक रूपमा जोडिँदै सिर्जना गर्नु रिमा श्रेष्ठको सांगीतिक यात्राको महत्वपूर्ण विशेषता हो। नेपाली भाषा, कला, संस्कृति र मौलिक पहिचानप्रतिको उनको निरन्तर लगावले प्रवासबाट पनि नेपाली सिर्जनाको क्षेत्रमा उल्लेखनीय योगदान पुर्याइरहेको छ।
‘देशको शान’ पनि उनको यही देशप्रेम, संवेदनशीलता र सिर्जनशीलताको एउटा सशक्त अभिव्यक्ति बनेको छ। गीतमार्फत उनले केवल मनोरञ्जन प्रस्तुत गर्ने प्रयास मात्र गरेकी छैनन्, देश, समाज र नयाँ पुस्ताप्रतिको आफ्नो जिम्मेवारी तथा भावनालाई समेत सिर्जनामार्फत अभिव्यक्त गरेकी छन्। प्रवासमा बसेर पनि मातृभूमिको पीडा, आशा, परिवर्तनको चाहना र नेपाली युवाको भावनालाई गीतमा समेट्नु रिमा श्रेष्ठको सिर्जनात्मक यात्राको विशेष पक्षका रूपमा देखिन्छ।
चितवन । तिब्बतबाट आएको बाढी तथा पहिरोका कारण भोटेकोशी नदीमा बगेको मृतकको शवबाट कानको सुनको मुन्द्रा निकाल्दै गरेको भिडियो सामाजिक सञ्जालमा भाइरल भएपछि प्रहरीले घटनामा संलग्न दुई जनालाई पक्राउ गरेको छ।
भाइरल भिडियोमाथि अनुसन्धान गर्ने क्रममा भिडियोमा देखिएका व्यक्तिहरूको पहिचान गरी प्रहरीले २०८३ भदौ ११ गते चितवनको भरतपुर महानगरपालिका–१, पोखरा बसपार्क नजिकबाट उनीहरूलाई नियन्त्रणमा लिएको हो।
पक्राउ पर्नेमा नवलपरासीको विनय त्रिवेणी नगरपालिका–१ घर भई हाल भरतपुर–१ लीलाचोकमा बस्दै आएका २५ वर्षीय मदन गुरुङ र सुनसरीको चादँबेला नगरपालिका–५ घर भई हाल भरतपुर–२, पोखरा बसपार्क सुपारी टोलमा बस्दै आएका ३८ वर्षीय उमेश चौधरी रहेका छन्।
उनीहरूलाई थप अनुसन्धानका लागि जिल्ला प्रहरी कार्यालयमा बुझाइएको प्रहरीले जनाएको छ।
भरतपुर । नेपाल लेयर्स कुखुरा पालक संघले प्रधानमन्त्री दैवी प्रकोप उद्धार कोषमा १० लाख रुपैयाँ सहयोग गरेको छ । रसुवा बाढी प्रभावितको राहतका लागि संघले कोषमा सहयोग गरेको हो ।
संघका अध्यक्ष विनोद पोखरेलले रसुवा बाढीपछि राहत र उद्धारका लागि सरकारले आर्थिक सहयोगको आह्वान् गरेपछि संघले १० लाख रुपैयाँ सहयोग गरेको बताए ।
बुधबार चीनको तिब्बततर्फबाट रसुवाको भोटेकोशी हुँदै त्रिशूली नदीमा आएको बाढीका कारण रसुवा, धादिङ, नुवाकोट, गोरखालगायतका जिल्लामा भएको अकल्पनीय मानवीय र भौतिक क्षतिप्रति अध्यक्ष पोखरेलले दुःख व्यक्त गरे । उनले भने, ‘हामी नेपालको इतिहासमै त्रासदीपूर्ण घटनामा परी ज्यान गुमाएका नागरिकप्रति श्रद्धाञ्जली व्यक्त गर्दै घाइतेहरुको स्वास्थ्य लाभको कामना गर्दछौँ ।’
संघले भूकम्पलगायतका प्राकृतिक विपत्तिहरुमा सहयोग गर्दै आएको स्मरण गर्दै अध्यक्ष पोखरेलले व्यवसायसँग राष्ट्रका लागि परेको विपत्तिमा थोरै भए पनि संघले सहयोग गरेको बताए ।
रत्ननगर । रत्ननगर नगरपालिका स्वास्थ्य शाखाको आयोजनामा पालिकास्तरीय स्वास्थ्य कार्यक्रमको वार्षिक समीक्षा तथा प्रगति विवरणबारे बिहीबार छलफल तथा अन्तर्क्रिया गरिएको छ ।
कार्यक्रममा २०८२–०८३ मा सम्पादित स्वास्थ्य कार्यक्रमहरुको पालिकास्तरीय समीक्षा एवम् कार्यप्रगतिबारे स्वास्थ्य शाखा प्रमुख माधवप्रसाद पौडेलले प्रस्तुत गरेका थिए । उनले स्वास्थ्यका सूचकहरु अघिल्लो वर्षभन्दा राम्रो रहेको बताए । उनले स्वास्थ्य संस्थाको भौतिक संरचना र कोठाहरुको व्यवस्थापन गर्न सकिए अझै अङ्क बढ्ने बताए ।
कार्यक्रममा स्वास्थ्यचौकी, नगर स्वास्थ्यकेन्द्र र आधारभूत स्वास्थ्यकेन्द्रका प्रमुखहरुले आआफ्नो वडामा आर्थिक वर्ष २०८२–०८३ मा भए–गरेका स्वास्थ्यसेवासम्बन्धी कार्यक्रमहको अद्यावधिक विवरण प्रस्तुत गरेका थिए । उनीहरुले पालिकाका १५ वटा स्वास्थ्य संस्थाको वडास्तरीय समीक्षा प्रस्तुत गरेका थिए ।
कार्यक्रममा सामाजिक विकास समितिका संयोजक सोहेन्द्रराज खरेलले स्वास्थ्यसम्बन्धी प्रगति विवरण समयमै अद्यावधिक गर्न र नगरवासीलाई उत्कृष्ट सेवा प्रवाह गर्नका लागि सचेतनासहित समुदायमा केन्द्रित हुन स्वास्थ्यकर्मीहरुलाई सुझाव दिए । उनले स्वास्थ्यकर्मी साथीहरुको लगाव, क्षमता र अनुभवका कारण स्वास्थ्य क्षेत्रमा रत्ननगरको नतिजा राम्रो रहेको र आगामी दिनमा पनि आपसी सहयोग र राय लिई स्वास्थ्य सेवाका सूचकहरुको अद्यावधिक गर्न अनुरोध गरे ।
यस्तै, प्रमुख प्रशासकीय अधिकृत प्रकाश खनालले सेवाग्राहीलाई विश्वासमा लिएर काम गर्न स्वास्थ्यकर्मीहरुलाई निर्देशन दिँदै सेवा प्रवाहका क्रममा कर्मचारीको व्यवहार शिष्ट र मर्यादित हुनुपर्नेमा जोड दिए । रत्ननगरको स्वास्थ्यसेवामा ७५ प्रतिशत सेवाग्राही सन्तुष्ट रहेको आफ्नो अनुसन्धानमा पत्ता लागेको भन्दै उनले त्रुटिरहित नतिजा प्रवाह गर्न आग्रह गरे । उनले भने, ‘कार्यतालिका बनाएर समयमै काम गर्नुहोस्, जनप्रतिनिधि र सरोकारवालाको सहभागितामा स्वास्थ्यका सूचकहरु बढाउने गरी काम गर्नुहोस् । गुणस्तरीय स्वास्थ्यसेवा प्रदान गर्नुहोस् ।’
स्वास्थ्य शाखाका सहसंयोजक वासुदेव सापकोटाको संयोजकत्वमा भएको कार्यक्रम स्वास्थ्य शाखाकी नर्सिङ इन्चार्ज अम्बिका पौडेलले सञ्चालन गरेकी थिइन् ।
कार्यक्रममा सहजकर्ताका रुपमा जनस्वास्थ्य कार्यालय चितवनका तथ्याङ्क अधिकृत इन्द्रमणि भण्डारीले स्वास्थ्यकर्मीहरुलाई योजना बनाएर स्वास्थ्य कार्यक्रमको विवरण अद्यावधिक गर्न सुझाव दिए । स्वास्थ्यका सूचक निकाल्ने विषयमा ढिलासुस्ती गर्न नहुने् बताउँदै उनले वडाका जनप्रतिनिधिहरुसँग बसेर छलफल गरी कार्यक्रम गर्न र आपसी सहयोग र समन्वय गरी रजिस्टरमा विवरण अद्यावधिक गर्न जोड दिए ।
रत्ननगर । भदौ १० गते भोटेकोशीमा आएको विनाशकारी बाढीका कारण विपत्तिमा परेका नागरिकहरूको उद्धार, राहत तथा पुनर्निर्माणका लागि रत्ननगर नगरपालिकाले प्रधानमन्त्री राहत कोषमा ३२ लाख रुपैयाँभन्दा बढी रकम सहयोग गर्ने घोषणा गरेको छ । नगरप्रमुख प्रलाद सापकोटाको अध्यक्षतामा बसेको नगरस्तरीय विपद् व्यवस्थापन समितिको आकस्मिक बैठकले राहत सहयोग जुटाउने निर्णय गरेको हो ।
विपद्को वर्तमान घडीमा अग्रसरता देखाउँदै नगरका जनप्रतिनिधि, कर्मचारी तथा शिक्षकहरूले आफ्नो सेवा–सुविधा र पारिश्रमिकबापत तीन दिनबराबरको अंश कट्टा गरी योगदान गर्ने भएका हुन् ।
सहयोग सङ्कलनका क्रममा नगरप्रमुख प्रलाद सापकोटाले आफ्नो तीन महिनाको सेवासुविधाबापतको ९९ हजार रुपैयाँ प्रधानमन्त्री राहत कोषमा जम्मा गर्दै भनेका छन्, ‘भोटेकोशी नदीमा आएको भीषण बाढीका कारण भएको जनधनको क्षतिले अत्यन्तै दुःखी र मर्माहत बनाएको छ । यस दुःखद् घटनामा ज्यान गुमाउनुहुने सम्पूर्णप्रति भावपूर्ण श्रद्धाञ्जली तथा शोकसन्तप्त परिवारमा हार्दिक समवेदना व्यक्त गर्दछु । घाइतेहरूको शीघ्र उपचार तथा स्वास्थ्यलाभको कामना गर्दछु ।’
‘यस विषम परिस्थितिमा म रत्ननगरको नगरप्रमुखको हैसियतले आफ्नो जिम्मेवारी र मानवीय कर्तव्य सम्झँदै मेरो तीन महिनाको सेवा–सुविधाबापत प्राप्त हुने रकम नगद ९९ हजार रुपैयाँ राज्यकोषमा जम्मा गरेको छु’, उनले फोनपेमार्फत रकम हस्तान्तरण गर्दै सामाजिक सञ्जाल फेसबुकमा लेखेका छन् ।
उपप्रमुख यादवप्रसाद पाठकले पनि सेवासुविधाबापत १० हजार रुपैयाँ सहयोग उपलब्ध गराउने भएका छन् । यस्तै, जनप्रतिनिधितर्फबाट वडा नं–३ का अध्यक्ष एवम् सामाजिक विकास समितिका संयोजक सोहेन्द्रराज खरेलले एक महिनाको सुविधाबापतको २७ हजार रुपैयाँ, अन्य १५ जना वडाध्यक्षले जनही ५ हजार रुपैयाँ र कार्यपालिका तथा वडा सदस्यहरूले जनही दुई हजार ५०० रुपैयाँका दरले रकम जुटाउने भएका छन् ।
नगरपालिकाका स्थायी तथा करार कर्मचारी र शिक्षकहरूले सामूहिकरूपमा २५ लाख रुपैयाँभन्दा बढी राहत सङ्कलन गर्नेछन् भने नगरपालिकाको नगर तथा वडा विपद् कोषबाट थप ५ लाख रुपैयाँ विनियोजन गरिने प्रमुख प्रशासकीय अधिकृत प्रकाश खनालले जानकारी दिए ।
उनका अनुसार जनप्रतिनिधि, कर्मचारी र शिक्षकहरूबाट सङ्कलित रकम एकमुष्टरूपमा प्रधानमन्त्री राहत कोषमा पठाइने छ । उनले विपद् प्रभावित नागरिकलाई तत्काल राहत पुर्याउन सम्पूर्ण नगर परिवार एकजुट भएर लागेको उनले बताए ।
नगरपालिकाले नगरभित्रका सम्पूर्ण संघसंस्था, समाजसेवी, उद्योगी, व्यवसायीलगायतलाई विपद्को पीडामा मलम लगाउन यथाशक्य सहयोग गर्न आह्वान् गरेको छ ।
काठमाडौँ । रसुवाको भोटेकोसी नदीमा आएको भीषण बाढीमा परी मृत्यु हुनेको संख्या ५५ पुगेको छ । बाढीपछि विभिन्न स्थानमा गरिएको खोज तथा उद्धारका क्रममा हालसम्म ५५ जनाको शव फेला परेको बागमती प्रदेश प्रहरी कार्यालय हेटौँडाले जनाएको छ ।
प्रहरीका अनुसार मृतकमध्ये ३१ जना पुरुष र २२ जना महिला छन् । थप दुई जनाको शव फेला परे पनि उनीहरूको पहिचान खुल्न सकेको छैन । भोटेकोसी बाढीबाट सबैभन्दा बढी मानवीय क्षति चितवनमा भएको प्रहरीले जनाएको छ । चितवनमा ५ महिला र १३ पुरुष गरी १८ जनाको शव फेला परेको छ ।
यस्तै, धादिङमा ११ महिला र ५ पुरुष गरी १६ जनाको मृत्यु भएको छ । नुवाकोटमा ५ महिला र ६ पुरुष गरी ११ जनाको शव फेला परेको छ ।
गोरखामा १ महिला, ६ पुरुष र पहिचान नखुलेका २ जनासहित ९ वटा शव फेला परेको बागमती प्रदेश प्रहरी कार्यालयले जनाएको छ । रसुवामा भने १ जना पुरुषको शव फेला परेको छ ।
बाढीमा परी घाइते भएका ९३ जनाको समेत उद्धार गरिएको छ । उद्धार गरिएकामध्ये रसुवाबाट ४३ जना, नुवाकोटबाट ४७ जना र धादिङबाट ३ जना रहेका छन् ।
उद्धार गरिएका घाइतेलाई विभिन्न अस्पताल तथा स्वास्थ्य संस्थामा पठाएर उपचार भइरहेको प्रहरीले जनाएको छ ।
भोटेकोसीमा आएको बाढीले रसुवा, नुवाकोट, धादिङलगायतका जिल्लामा ठूलो जनधनको क्षति पुर्याएको छ । प्रभावित क्षेत्रमा बेपत्ता तथा जोखिममा परेकाहरूको खोजी र उद्धार कार्य जारी रहेको प्रहरीले जनाएको छ ।
काठमाडौँ । २०७२ सालमा आफ्नो लेखन, निर्माण तथा निर्देशनमा बनेको ‘भैरव’मार्फत धमाकेदार एक्सन पस्केर सबैलाई आश्चर्यमा पारेका निखिल उप्रेतीले आफ्नो नयाँ सिनेमा ‘आचार्य’को मंगलबार सार्वजनिक टिजरमार्फत थप आश्चर्य बाहिर ल्याएका छन् । सार्वजनिक टिजरले थप परिस्कृत र धमाकेदार एक्सनसहित निखिल दर्शकमाझ आउने बलियो संकेत गरेका छन् । नेपाली फिल्ममा अहिलेसम्मको नयाँ प्रयोगसहितको एक्शन समावेश गरि टिजर सार्वजनिक गरिएको हो ।
टिजरमा निखिललाई आकर्षक स्टन्ट र एक्सन गर्दै गरेको देख्न सकिन्छ । यसपटक उनले दर्शकलाई फरक र विशेष शैलीको एक्सन देखाउने संकेत टिजरमार्फत सशक्त रूपमा गरेका छन् । सार्वजनिक टिजरमा एक्सन र इमोसनले भरिपूर्ण छ, जसमा निखिल उप्रेतीलाई फरक–फरक अवतारमा देख्न सकिन्छ । नेपाली फिल्ममा दर्शकको आङ नै जिरिङ्ग पार्ने खतरनाक स्टन्टको सुरुवात गर्ने निखिलले यस फिल्ममार्फत पनि त्यसलाई निरन्तरता दिएका छन् । सामान्यतः नेपाली फिल्ममा कमै देख्न पाइने उच्चस्तरका एक्सन र स्टन्ट टिजरमा समावेश गरिएका छन् । ‘आचार्य’ अभिनेता निखिल उप्रेतीको निर्देशनमा बनेको दोस्रो फिल्म हो ।
यस फिल्ममा निखिलका साथै दक्षिण भारतीय कलाकार रघु बाबू र रघु करुमन्चीको पनि अभिनय रहेको छ । फिल्ममार्फत पूर्णिका सिजापतिले नव–नायिकाका रूपमा डेब्यु गर्दैछिन् । त्यसैगरी, बलिउड कलाकार दीपजङ्ग राणा र रोहित चौधरीसँगै नेपाली कलाकार ध्रुव कोइराला, सुरेश कोहली, रञ्जित कोइराला, जेसिका पोखरेल, कृतिका, सरिता ज्ञवाली, अनुप तुलाधर, एलिस खनाल, अजय थापा, सुबिन गुरुङ, रोशनी र सोनिका वास्तोलालगायतको अभिनय देख्न सकिन्छ ।
सौरभ लामा, मनु विक र नवराज थापाले छायाङ्कन गरेको यस फिल्ममा शुक्रराज शाहको एक्सन निर्देशन रहेको छ । बन्दे प्रसादले सम्पादन गरेको ‘आचार्य’को टिजर तथा ट्रेलर भने सन्देश शाहले तयार पारेका हुन् । निर्माण पक्षका अनुसार फिल्मको आधिकारिक ट्रेलर आगामी असोज १ गते सार्वजनिक गरिनेछ भने फिल्म असोज ९ गतेदेखि प्रदर्शनमा आउने तयारीमा छ ।





