रत्ननगर । रत्ननगर–९ वडा कार्यालयको आयोजनामा आधारभूत स्वास्थ्यकेन्द्र मोहनामा गर्भवती, सुत्केरी तथा क्षयरोगीहरुलाई पौष्टिक आहार वितरण गरिएको छ ।
स्वास्थ्यकेन्द्रमा नियमित सेवा लिनेमध्येबाट ६२ जना गर्भवती, सुत्केरी तथा क्षयरोगीहरुलाई पौष्टिक आहार वितरण गरिएको आधारभूत स्वास्थ्यकेन्द्र मोहनाका प्रमुख विदुर बस्ताकोटीले जानकारी दिए ।
उनका अनुसार १४ जना क्षयरोगका, एक जना कुष्ठरोगका र अन्य गर्भवती तथा सुत्केरी महिलालाई पौष्टिक आहार वितरण गरिएको हो । चामल, दाल, तेल, अण्डा/घिउ, केराउ, चना, नुन, नुहाउने र लुगाधुने साबुन गरी जनही तीन हजार रुपैयाँबराबरको सामग्री वितरण गरिएको उनले बताए ।
रत्ननगर–९ का वडाध्यक्ष अनन्त अधिकारीको अध्यक्षतामा भएको कार्यक्रममा प्रमुखअतिथि रत्ननगर नगरपालिकाका प्रमुख प्रशासकीय अधिकृत प्रकाश खनालले वडा कार्यालयले साङ्केतिकरूपमा स्वास्थ्य सचेतनाका लागि पोषण र सरसफाइ सामग्री वितरण गरेको बताए । रत्ननगरले आठपटक गर्भवती परीक्षण र ९८ प्रकारका औषधि निःशुल्क वितरण गर्दै आएको र तीन सरकारी अस्पतालमा ७५ लाखबराबरको मेडिकल कोष खडा गरी नागरिकलाई स्वास्थ्यसेवा प्रदान गर्दै आइरहेको जानकारी दिए ।
सो अवसरमा स्वास्थ्य शाखा प्रमुख माधवप्रसाद पौडेलले पोषण शारीरिक वृत्तिविकासका लागि महत्त्वपूर्ण रहेकोले गर्भवती अवस्थादेखि नै पोषणयुक्त खानेकुरा खानुपर्ने बताए । सुनौलो हजार दिनसम्म बच्चाको तौल परीक्षण गरी कुपोषण हुनबाट जोगाउनसमेत गर्भवती तथा सुत्केरी महिलाहरुलाई आग्रह गरे ।
वडाध्यक्ष अनन्त अधिकारीले स्वास्थ्यकेन्द्रमा नियमित परीक्षण गर्ने गर्भवती तथा सुत्केरी महिलाका लागि वडा कार्यालयले हरेकवर्ष पौष्टिक आहार वितरण गर्दै आएको बताए । वडामा भविष्यका कर्णाधारहरु स्वस्थ जन्मिओस् र वडावासीले नियमित सेवा लिन सकून् भनेर स्वास्थ्य शिविरका कार्यक्रमहरु सञ्चालन गरिँदै आएको उनले बताए । उनले भने, ‘अब कसैले पनि रोग पालेर बस्नुपर्दैन । उपचारको अभावमा कोही मर्नुपर्दैन । वडावासीको स्वास्थ्य सरोकारका विषयमा हामी अत्यन्त संवेदनशील छौँ ।’
वडा सचिव सूर्यप्रसाद ढुङ्गानाले सञ्चालन गरेको कार्यक्रममा वडा सदस्य कमानसिङ चौधरीले स्वागत मन्तव्य राखेका थिए । कार्यक्रममा वडा सदस्य लेखबहादुर तामाङ, सबिता चौधरी, सुष्मा खड्काथोकी, मोहना माविका प्रधानाध्यापक दयाराम ढकाल, समाजसेवी रामचन्द्र पौडेल, मणिप्रकाश खतिवडा, स्वास्थ्यकर्मीहरुलगायतको उपस्थिति रहेको थियो ।
