रत्ननगर । रत्ननगर नगरपालिका स्वास्थ्य शाखाको आयोजनामा रत्ननगर–१४, डुम्रीचोकस्थित नगर स्वास्थ्यकेन्द्रमा एआई प्रविधिबाट निःशुल्क छातीको एक्स–रे परीक्षण शिविर सम्पन्न भएको छ ।
नगर स्वास्थ्यकेन्द्र डुम्रीचोकका इन्चार्ज भेषकुमारी न्यौपानेका अनुसार कुल २२६ जनाको छातीको एक्स–रे परीक्षण गरिएकोमा दुई जनामा पिसिडी केस (छातीको क्षयरोग) पत्ता लागेको छ । यस्तै, एक्स–रेमा नदेखिएका शंकास्पद १० जनाको खकार सङ्कलन गरी थप जाँचका लागि बकुलहर रत्ननगर अस्पतालमा ‘जिन एक्सपर्ट’ परीक्षणका लागि पठाइएको उनले जानकारी दिइन् ।
रत्ननगर–१४ का वडाध्यक्ष एवम् नगर स्वास्थ्यकेन्द्र व्यवस्थापन समितिका अध्यक्ष होमनाथ रानाभाटले छातीको एक्स–रे परीक्षण परी कार्यक्रमको उद्घाटन गरेका हुन् । सो अवसरमा वडाध्यक्ष रानाभाटले सकभर रोग लाग्न नदिनेतर्फ हरेक व्यक्ति सचेत हुनुपर्ने र रोग लागेमा पनि उपचार गरे पूर्णरुपमा निको हुने भएकाले क्षयरोगका शंकास्पद व्यक्तिले परीक्षण गर्नुपर्नेमा जोड दिए ।
उनले क्षयरोग लागेका बिरामीहरुका लागि वडा र कार्यपालिकाको तर्फबाट पौष्टिक आहार उपलब्ध गराउने प्रतिबद्धतासमेत व्यक्त गरे ।
कार्यक्रममा स्वागत मन्तव्य व्यक्त गर्दै स्वास्थ्य शाखा प्रमुख माधवप्रसाद पौडेलले क्षयरोग लाग्दैमा डराउनु नपर्ने र छ महिना नियमित औषधि सेवन गरेमा पूर्णरुपमा निको हुने बताए । रत्ननगर नगरपालिकाले सम्भावित जोखिमको क्षेत्रहरु पहिचान गरी रत्ननगर–१४ मा एआई प्रविधिबाट निःशुल्क छातीको एक्स–रे गरी क्षयरोगको स्क्रिनिङ शिविर सञ्चालन गरिएको जानकारी दिए ।
जनस्वास्थ्य अधिकृत पौडलले क्षयरोग सरुवा रोग भएकाले हरेक व्यक्ति आफू सुरक्षित हुनुपर्ने बताए । भीडभाड बढी हुने स्थानमा सामाजिक दूरी कायम राख्दै क्षयरोग, कोभिडजस्ता सरुवा रोगबाट बच्न उनले सचेत गराए ।
कार्यक्रममा प्रमुखअतिथि सामाजिक विकास समितिका संयोजक एवम् रत्ननगर–३ का वडाध्यक्ष सोहेन्द्रराज खरेलले एआई प्रविधिको माध्यमबाट एक्स–रे गर्दा फोक्सोको अवस्था, श्वासप्रश्वासको अवस्था, धूँवा–धूलोको असर र मुटुको आकारबारे थाहा पाइने भएकाले यो प्रविधि निकै प्रभावकारी रहेको बताए । उनले उपचारबाट क्षयरोग निको हुने भएकाले कसैले पनि रोग लुकाउन नहुने बताए ।
