रत्ननगर । नेपाली कांग्रेसले चितवन क्षेत्र नं १ मा घरदैलो कार्यक्रम सुरू गरेको छ । प्रतिनिधिसभा उमेदवार राजेन्द्रप्रसाद बुर्लाकोटी गाउँटोलमा पुग्दा मतदाताहरु उत्साहित देखिएका छन् ।
आठ दशक इतिहास बोकेको लोकतान्त्रिक पार्टी जेनजी विद्रोहपश्चात् रुपान्तरित भई नयाँ दृष्टिकोणका साथ जनताको माझमा पुग्दा वृद्धवृद्धा, महिला र युवाहरु उत्साहित देखिएको र समाजसेवामार्फत जनताको दुःखसुखमा जोडिएका स्वच्छ र स्पष्ट छविका राजेन्द्रप्रसाद बुर्लाकोटीको पक्षमा जनलहर बढेको निर्वाचन परिचालक मूल समितिका संयोजक किरणभूषण सिंह ओली बताउँछन् ।
राष्ट्र र संविधानको रक्षाका लागि यसपटक नेपाली कांग्रेसलाई मतदान गर्न चितवन १ का जनता उत्सुक रहेको उनको भनाइ छ । उमेदवार बुर्लाकोटी घरदैलोमा पुग्दा वृद्धवृद्धाहरुले आर्शीवाद दिँदै ५० वर्ष राजनीति र समाजसेवामा जीवन सपर्पित गरेका बुर्लाकोटीलाई यसपटक जिताउने प्रतिबद्धता गरेका थिए ।
उमेदवार बुर्लाकोटी भन्छन्, ‘यसपटक मतदातामा उत्साही छन् । गाउँबस्तीमा पुग्दा धेरै आमाबुबाले आर्शीवाद दिनुभयो । जेनजी युवाहरुले तपाईंले यस क्षेत्रको परिवर्तन गर्न सक्नुहुन्छ भनेर विश्वास गरेका छन् । महिला दिदीबहिनीमा रौनक छाएको छ । म निकै उत्साहित भएको छु ।’
कांग्रेस क्षेत्र नं १ ले राप्ती नगरपालिकाबाट औपचारिक घरदैलो कार्यक्रम थालनी गर्ने जनाएको छ । संयोजक ओलीका अनुसार, माघ १९ गते राप्ती–८ मा बिहान ११ः०० बजे र राप्ती–७ मा दिउँसो २ः०० बजे घरदैलो कार्यक्रम हुनेछ ।
