भरतपुर । नेपाल पत्रकार महासंघ चितवनका अध्यक्ष बसन्त पराजुलीद्वारा लिखित उपन्यास ‘बखान’माथि भरतपुरको आँपटारीमा समीक्षा गरिएको छ ।
नेपाली लेखक संघ चितवनले विशेषगरी विद्यार्थीहरुलाई लक्षित गरी आयोजना गरेको सो कार्यक्रमका वक्ताहरुले बखान उपन्यास इतिहासको साक्षी भएको बताए । उनीहरुले उपन्यासले चितवनको पुरानो समाज प्रस्तुत गरेको टिप्पणी गरेका थिए ।
स्मल हेभन स्कुलका विद्यार्थी असीम सिलवालले कृतिमाथि समीक्षा गर्दै उपन्यासले सहकारी अभियन्ता एवम् समाज सुधारक बखानसिंह गुरूङको जीवनी उपन्यासमा पढ्न पाइएको सुनाए । उनले भने, ‘चितवनको इतिहास झल्काउन यो पुस्तक सफल भएको छ ।’
कार्यक्रममा बोल्दै विद्यार्थी विनिशा दवाडीले बखान पुस्तक बखानसिंह गुरूङको जीवनी मात्रै नभएर चितवनको बस्ती विकासको रुपरेखा देखाउने दस्तावेज भएको बताइन् । ‘उपन्यासले चितवनको इतिहास बोल्छ । समाज बोल्छ’, उनले भनिन् ।
साहित्यकार सुरेन्द्र अस्तफलले चितवनको बस्ती विकासदेखि सहकारी यात्राको विषयमा यस पुस्तकले समेटेको बताए । उनले भने, ‘यस पुस्तकले चितवनको इतिहास समेटेको छ ।’ चितवनमा बस्ती विकाससँगै नेपालमा विसं २००७ सालदेखि विसं २०४० सालसम्मका आन्दोलन र भएका उपलब्धिका विषयलाई समेटिएको उनले जनाए ।
सो अवसरमा पत्रकार सरिता पौडेलले चितवनका लागि यो कृति एतिहासिक कृति भएको बताइन् । सो अवसरमा स्मल हेभन स्कुलका प्रधानाध्यापक विमल क्षेत्रीले पुस्तकलाई स्थानीय पाठ्यक्रममा समावेश गरेर चितवनको बारेमा विद्यार्थी वर्गमा समेत ज्ञान दिन आवश्यक रहेको बताए ।
नेपाली लेखक संघकी अध्यक्ष शान्ति शर्माले चितवनको बारेमा गरिएको अध्ययनका कारण यो उपन्यास सार्थक भएको बताईन् । यस पुस्तकले साधारण विषयवस्तुलाई समेत गहन तवरले व्याख्य गरिएको उनले बताइन् ।
कार्यक्रममा लेखक पराजुलीले यो पुस्तक चितवनको इतिहास भएको बताए । उनले कक्षा १० देखि कक्षा १२ सम्म नेपाली र अङ्ग्रेजी विषयमा परीक्षामा समेत कृति समीक्षा आउने हुँदा विद्यार्थीहरुलाई यसमा यस्ता कर्यक्रमले सहज हुने बताए ।
