चितवन । चितवन क्षेत्र नं २ का लागि नेपाली कांग्रेसका तर्फबाट प्रतिनिधिसभा सदस्य उमेदवार मीना खरेलले आफ्नो जीवन सधैँभरि समाजका लागि सुम्पिएको बताउँदै अबको बाँकी यात्रा देश र जनताको लागि समर्पित गर्नका लागि चुनावी प्रतिस्पर्धामा आएको स्पष्ट पारेकी छन् ।
उमेदवार खरेलले सोमबार चितवनका पत्रकारहरसँग भेटघाटका क्रममा अबको जीवन देश र जनताका लागि समर्पित गर्न चाहेको बताएकी हुन् । उनले भनिन्, ‘अहिलेसम्म असहायको लागि काम गरेँ, अब देश र जनाको लागि समर्पित भएर काम गर्न चाहन्छु ।’
अहिले देशको विषम परिस्थितिमा जनताको घरदैलोमा पुग्नसक्ने एकमात्र उमेदवार आफू भएको भन्दै उनले जनताका प्रतिनिधि भेट्न चुनाव कुर्नुपनै अवस्था आउन नदिने विश्वास व्यक्त गरिन् ।
नेपाल प्रेस युनियन चितवनका अध्यक्ष अनिल ढकालको अध्यक्षतामा सम्पन्न कार्यक्रममा पत्रकारहरुको प्रश्नमा जवाफ दिँदै उनले भनिन्, ‘अब जनताले आफ्नो प्रतिनिधि खोज्दै हिँड्नुपर्ने अवस्था आउने छैन ।’ उनले थपिन्, ‘समाजको काममा नथाकेको म अब देशको काममा थाक्छु भन्ने लाग्दैन ।’
अहिले आफना मुद्दाहरु जनताको भावनाअनुसार रहेकाले आफू र सिंङ्गो कांग्रेस जनताको जनजीविकाका लागि सधैँ लाग्ने उनले बताइन् । बदलिएको कांग्रेस अब जनतामाझ बदलिएर आएको भन्दै उनले आफ्नो प्रतिस्पर्धी कोही नरहेको बताइन् ।
अहिले कांग्रेसको नेतृत्व गरेका गगनकुमार थापा आफैँमा युवा पुस्ताको भावनाअनुसार नेता चल्ने भएकाले सबै एकजुट भएर विजयी गराउन आग्रह गरिन् ।
सो अवसरमा नेपाली कांग्रेसका केन्द्रीय सदस्य जीतनारायण श्रेष्ठले कांग्रेस अहिले नयाँ नेतृत्व र नयाँ नीतिका साथ आएकाले सबै एक भएर कांग्रेसका उमेदवारलाई जिताउन आग्रह गरे ।
