भरतपुर । लोकप्रिय गायिका विष्णु माझीको तीज गीत ‘म त नराउरी’ सार्वजनिक भएको तीन दिनमै युट्युबमा ३० लाख ३० हजारभन्दा बढीपटक हेरिएको छ । तीज पर्वको छेको पारेर बुधबार सार्वजनिक भएको सो गीतमा १ लाख ६९ हजार बढीले प्रशंसायुक्त टिप्पणी गरेका छन् ।
तीज पर्वको परम्परा र मौलिकतालाई पछ्याएका कारण गायिका माझीको गीतलाई दर्शकस्रोताले रुचाएका हुन् । गत वर्ष पनि उनको तीज गीत ‘आइन आमा यो तीजमा‘’ ले सार्वजनिक भएको दुई दिन नबित्दै युट्युबमा ३० लाख बढी ‘भ्यूज’ बटुलेको थियो ।
माझीले विगत दुई दशकयता बर्सेनि तीज गीत सार्वजनिक गर्दै आएकी छन् । कतिपयले त विष्णु माझीको गीत आएपछि बल्ल तीज आएको आभास दिने गरेको टिप्पणीसमेत गर्छन् । तीजमात्र नभएर उनका हरेक लोकदोहोरी गीत सफल छन् ।
सुन्दरमणि अधिकारीको रचना र सङ्गीत रहेको गीत ‘म त नराउरी‘’ मा लैङ्गिक असमानताले निम्ताएको नारी वेदनालाई उठान गरिएको छ । गीतमा कुनै बेला नेपाली समाजमा व्याप्त छोरा र छोरीबीचको विभेदको मर्मस्पर्शी कथा छ । गीतले भन्छ–
‘दाइ र भाइले पिपलगेडी खाको
मैले छाम्दा गोजी रित्तै भाको‘’
गीतको म्युजिक भिडियोमा ललिता पौडेललगायत कलाकारको अभिनय रहेको छ । विगत केही वर्षदेखि कतिपय तीज गीत विवादमा तानिँदै आएकामा गायिका माझीको गीतले भने तीज गीतको मूल मर्मलाई समात्न सफल भएको छ । महिलाको संवेदना र मनोविज्ञान गीतमा मुखरित भएको छ । गीतमा मौलिकताको झल्को दिएको छ । यतिबेला हरेक ठाउँमा उनकै गीत घन्किरहेको छ ।
