कालिका । कालिका नगरपालिका वडा नं–३, शान्ति चोकमा स्कुटरले साइकललाई ठक्कर दिँदा तीन जना घाइते भएका छन् ।
मिलन चोकबाट जनहित स्कुलतर्फ जाँदै गरेको बागमती प्रदेश ०२–०४० प १०११ नम्बरको स्कुटरले सोही दिशातर्फ जाँदै गरेको साइकललाई ठक्कर दिँदा दुर्घटना भएको हो ।
दुर्घटनामा साइकलयात्री कालिका–३ बस्ने ४५ वर्षीय मानबहादुर गुरूङ, स्कुटर चालक कालिका–६ बस्ने ३० वर्षीया सविना लामिछाने र स्कुटरपछाडि सवार सोही ठाउँ बस्ने ३५ वर्षीया अम्बिकाकुमारी थापा घाइते भएका हुन् ।
स्कुटर चालकको नारायणी सामुदायिक हस्पिटल भरतपुरमा उपचार भइरहेको छ भने गुरूङ र थापाको एलाइभ हस्पिटल भरतपुरमा उपचार भइरहेको छ । दुवै सवारीसाधन प्रहरी बिट पदमपुरको नियन्त्रणमा रहेको प्रहरीले जनाएको छ ।
