रत्ननगर । रत्ननगर नगरपालिका स्वास्थ्य शाखाको आयोजनामा साउन महिनाको मासिक समीक्षा तथा प्रगति विवरणबारे छलफल तथा जेई सङ्क्रमणसम्बन्धी अभिमुखीकरण कार्यक्रम सम्पन्न भएको छ ।
कार्यक्रममा १६ वटै वडाका आधारभूत स्वास्थ्यकेन्द्र प्रमुख तथा स्वास्थ्यचौकी प्रमुखहरुले आआफ्नो वडामा भए–गरेका स्वास्थ्यसम्बन्धी अद्यावधिक विवरण प्रस्तुत गरेका थिए ।
सो अवसरमा सामाजिक विकास समितिका संयोजक सोहेन्द्रराज खरेलले स्वास्थ्यसम्बन्धी प्रगति विवरण समयमै अद्यावधिक गर्न र नगरवासीलाई उत्कृष्ट सेवा प्रवाह गर्न स्वास्थ्यकर्मीहरुलाई सुझाव दिए ।
उनले स्वास्थ्यकर्मी साथीहरुको लगाव, क्षमता र अनुभवका कारण स्वास्थ्य क्षेत्रमा रत्ननगरको नतिजा परिणाममुखी रहेको र आगामी दिनमा पनि आपसी सहयोग र राय लिई स्वास्थ्यसेवाका सूचकहरुको अद्यावधिक गर्न आग्रह गरे ।
स्वास्थ्य शाखा प्रमुख एवम् जनस्वास्थ्य अधिकृत माधवप्रसाद पौडेलले स्वास्थ्यकर्मीहरुले प्रस्तुत गरेको प्रगति विवरणबारे समीक्षा गर्दै कमिकमजोरी सुधार गरी अगाडि बढ्न सबै स्वास्थ्यकर्मीहरुमा आग्रह गरे ।
सो अवसरमा जनस्वास्थ्य कार्यालय चितवनका तथ्याङ्क अधिकृत इन्द्रमणि भण्डारीले स्वास्थ्यकर्मीहरुलाई आपसी सहयोग र समन्वय गरी रजिस्टरमा विवरण अद्यावधिक गर्न सुझाव दिए । उनले स्वास्थ्यकर्मीहरुले प्रस्तुत गरेको प्रगति विवरणमाथि समीक्षा गर्दै आवश्यकीय सहजीकरण गरेका थिए ।
सो अवसरमा समग्र स्वास्थ्य संस्थाहरुको अवस्था र सुधार गर्नुपर्ने विषयहरु समेटिएको माग पत्र पिठुवा स्वास्थ्यचौकी इन्चार्ज नरहरि श्याम शर्माले सामाजिक विकास समितिका संयोजक सोहेन्द्रराज खरेलसमक्ष पेस गरे ।
कार्यक्रमका अध्यक्षसमेत रहेका संयोजक खरेलले स्वास्थ्य संस्था र स्वास्थ्यकर्मीहरुको तर्फबाट राखिएको माग पत्रका सम्बन्धमा आगामी कार्यपालिका बैठकमा प्रस्तुत गरी सम्बोधन गर्ने प्रतिबद्धता व्यक्त गरे ।
कार्यक्रममा किटजन्य रोगबारे सचेतना तथा जेई सङ्क्रमणसम्बन्धी अभिमुखीकरण गरिएको थियो । बकुलहर रत्ननगर अस्पतालका डा. सन्देश रौनियारले अभिमुखीकरण कार्यक्रममको सहजीकरण गरेका थिए ।
