रत्ननगर । नेपाल सरकारले पूर्वी चितवनको खैरहनीसहित देशका २३ जिल्लामा नयाँ इलाका प्रशासन कार्यालय स्थापना गर्ने निर्णय गरेको छ ।
गृह मन्त्रालयका सूचना अधिकारी तथा सहायक प्रवक्ता रवीन्द्र आचार्यले चितवनको खैरहनीसहित देशका २३ स्थानमा इलाका प्रशासन कार्यालय राख्ने निर्णय भएको जानकारी दिए । उनका अनुसार, सोमबार बसेको मन्त्रिपरिषद् बैठकले गृह मन्त्रालयको प्रस्ताव स्वीकृत गर्दै यो निर्णयलाई प्रशासन समितिमा पठाएको छ । प्रशासन समितिले अब कार्यान्वयन प्रक्रिया अगाडि बढाउने छ ।
गृह मन्त्रालयका अनुसार यी २३ इलाका प्रशासन कार्यालय स्थापना गर्ने योजना मन्त्रालयको वार्षिक बजेटमा समावेश छ । यसका लागि आवश्यक भौतिक संरचना निर्माण र कर्मचारी व्यवस्थापनका लागि दरबन्दी सिर्जना प्रक्रिया सुरू हुनेछ । अर्थ मन्त्रालयले बजेट निकासा गरेपछि कार्यालय स्थापनाको कामले गति लिने बताइएको छ ।
यी कार्यालयहरू जनसंख्या, भौगोलिक सुगमता र सेवा पहुँचमा देखिएको असमानता समाधान गर्न स्थापना गर्न लागिएको मन्त्रालयले जनाएको छ। मन्त्रालयले आगामी दिनमा थप इलाका प्रशासन कार्यालयहरू स्थापना गर्ने दीर्घकालीन योजना पनि बनाएको छ ।
नयाँ कार्यालयहरू स्थापना हुने स्थानहरूमा चितवनको खैरहनी, ताप्लेजुङको सिरिजङ्गा, खोटाङको हलेसी, ओखलढुङ्गाको घोराखोरी, सिरहाको सुखीपुर, धनुषाको धनुषाधाम, सर्लाहीको बलरा, पर्साको पोखरिया, सिन्धुलीको दुधौली, काठमाडौँको टोखा, डोल्पाको धो, मुगुको खत्याड, कालिकोटको रास्कोट, बाजुराको कोल्टी, बझाङको देउरा, अछामको साफेबगर, डोटीको बिपीनगर, दार्चुलाको गोकुलेश्वर, बैतडीको मेलौली, सङ्खुवासभाको हेदङ्गवा, रुपन्देहीको गैडहवा, तनहुँको भिमाद र अर्घाखाँचीको सितगङ्गा रहेका छन् ।
