रत्ननगर । रत्ननगर–१५ वडा कार्यालयले सुत्केरी र गर्भवती महिलालाई आइतबार पौष्टिक आहार वितरण गरेको छ । सो वडाले १० जना सुत्केरी र ६ जना गर्भवती गरी १६ जनालाई कुखुराको भाले, दुई किलो नौनी घ्यु, एक क्रेट अन्डा, एक किलो मह, मुङको दाल, चनालगायत सरसफाइका सामग्री प्रदान गरेको हो ।
आधारभूत स्वास्थ्य सेवाकेन्द्रमा आयोजित कार्यक्रममा वडाध्यक्ष आशिक तामाङले सुत्केरी र गर्भवती महिलालाई पौष्टिक आहारलगायतका सामग्री हस्तान्तरण गरेका हुन् ।
वडाध्यक्ष तामाङले सुरक्षित मातृत्व कार्यक्रमअन्तर्गत सुत्केरी आमा र शिशुको स्वास्थ्य सुरक्षा सुनिश्चित गर्न पौष्टिक आहार वितरण गरिएको बताए । उनले स्थानीय किसानले उत्पादन गरेका कुखुरा, अन्डा, नौनी घ्युलगायत सामग्री खरिद गरी वितरण गरिएको जानकारी दिए । यसबाट स्थानीय उत्पादनलाई पनि प्रोत्साहन गर्न टेवा मिल्ने उनले बताए ।
‘सुत्केरी र गर्भवतीको पोषण तथा स्वास्थ्य स्थानीय सरकारको जिम्मेवारी हो’, उनले भने, ‘पूर्वाधार निर्माण मात्र विकास होइन, नागरिकको स्वास्थ्य र सुरक्षा पनि उत्तिकै मह¤वपूर्ण छ ।’ माधवपुरवासीको सुखदुःखमा वडा कार्यालय सधैँ साथमा रहेको अनुभूति दिलाउन सो कार्यक्रम आयोजना गरिएको उनको भनाइ थियो ।
वडाले सुत्केरी र गर्भवतीलाई पौष्टिक आहारसँगै भ्याक्सिन, भिडियो एक्स–रे लगायतका आधारभूत स्वास्थ्यसेवा प्रदान गर्दै आएको छ । स्वास्थ्य सेवाकेन्द्रकी प्रमुख रोजिना गिरीका अनुसार विभिन्न चरणमा १५५ जना सुत्केरी र गर्भवती महिलालाई पोषण सामग्री वितरण गरिसकिएको छ ।
कार्यक्रममा वडा सदस्यहरू शिव तिवारी, इमप्रसाद पन्त, लीलादेवी पोखरेल, रुकमाया परियार, वडा सचिव नवराज तिवारी, सामुदायिक महिला स्वास्थ्य स्वय्सेविका लगायतको उपस्थिति थियो । वडा सदस्य रुकमाया परियारले स्वागत मन्तव्य राखेको कार्यक्रम स्वास्थ्य सेवाकेन्द्रकी प्रमुख रोगिना गिरीले सञ्चालन गरेकी थिइन् ।
