इच्छाकामना । इच्छाकामना गाउँपालिका वडा नं–६, नाम्सी पुलस्थित सडकमाथिबाट खसेको ढुङ्गा लागेर बसमा सवार एक महिलाको मृत्यु भएको छ ।
मुग्लिन–नारायणगढ सडकखण्डस्थित तनहुँबाट नारायणगढतर्फ जाँदै गरेको ग २ ख १८३६ नम्बरको बसमा सवार लमजुङको घले गाउँपालिका वडा नं–३ बस्ने ४६ वर्षीया ऐश्वर्या कामी गम्भीर घाइते भएकी थिइन् ।
सडकमाथिबाट खसेको ढुङ्गा बसको ढोकाबाट छिरेर कामीको अनुहार र टाउकोमा चोट लागेको थियो । घाइते महिलाको पुरानो मेडिकल कलेज (सिएमएस), भरतपुरमा उपचारका क्रममा मङ्गलबार बेलुकी ७ः२० बजे डाक्टरले मृत घोषणा गरेका हुन् ।
घटनाबारे मृतकका छोरी पूर्णकुमारी कामीलाई खबर भइसकेको र बस तथा चालक तनहुँको म्याग्दे गाउँपालिका वडा नं–२ बस्ने ३५ वर्षीय तेजकुमार शाही जिल्ला प्रहरी कार्यालय चितवनको नियन्त्रणमा रहेको प्रहरीले जनाएको छ ।
