रत्ननगर । जेनजी आन्दोलनका क्रममा ध्वस्त भएको इलाका प्रहरी कार्यालय रत्ननगरको सरसफाइपछि रंगरोगनको काम जारी छ । रत्ननगर उद्योग वाणिज्य संघले सबै पक्षसँग छलफल गरेर पुनर्निर्माणको काम सुरू गरेको हो । संघले समिति नै बनाएर निर्माणको काम गरिरहेको छ ।
प्रहरी कार्यालय हाम्रै सम्पत्ति हो भनेर यसलाई पहिलेकै अवस्थामा ल्याउने गरी काम भइरहेको संघका अध्यक्ष शंकर गिरीले जानकारी दिए । ‘उद्योगी, व्यवसायीलगायत आमनागरिकलाई प्रहरीको सहयोग आवश्यक पर्छ, दुःखका बेलामा हातेमालो गर्ने प्रयास हो । उनले भने, ‘दसैँअगाडि नै यसलाई पहिलेकै अवस्थामा ल्याउने गरी काम भएको छ ।’
उनका अनुसार न्यूनतम खर्चमा काम सक्ने योजना रहेको छ । खर्चको व्यवस्थापन रत्ननगरकै उद्योगी, व्यवसायीसँग सहयोग जुटाएर गरिएको उनले बताए । अहिले रंग लगाउने काम भइरहेको र यसलगत्तै झ्यालढोकाको काम सुरू हुने छ । आगलागीबाट भित्र रहेका सबै कागजात र फर्निचर जलेर नष्ट भएका छन् । कार्यालयको मुद्दा शाखा पूर्णरुपमा नष्ट भएको छ । कार्यालय परिसरभित्र रहेको मुख्य प्रशासनिक भवन, आवास, क्यान्टिन, भान्सा सबै भवनमा क्षति पुगेको छ । कार्यालयका सवारीसाधन र मोटरसाइकल पनि आगजनीपछि पूर्णरुपमा नष्ट भएका छन् ।
इलाका प्रहरी कार्यालय रत्ननगरमा आइतबारदेखि नयाँ कार्यालय प्रमुख प्रहरी नायब उपरीक्षक (डिएसपी) सुवास भट्टले कमान्ड सम्हालेका छन् । उनले यहाँका व्यवसायीको सहयोगबाट कार्यालय छिट्टै पहिलेकै अवस्थामा आउने विश्वास व्यक्त गरेका छन् । यसअघि जेनजी आन्दोलनका क्रममा यहाँको कमान्ड रञ्जन अवाले सम्हाल्दै आएका थिए ।
डिएसपी भट्टले जिरो अवस्थाबाट काम सुरू गर्नुपर्ने भएकाले केही अप्ठ्यारो भए पनि यहाँका स्थानीय सरकारलगायत सरोकारवालाको साथ र सहयोगमा आफू अघि बढ्ने प्रतिबद्धता व्यक्त गरे । कार्यालय पुनर्निर्माणसँगै शान्ति सुरक्षाका सवालमा कोही कसैसँग सम्झौता नगरी कार्य सम्पादन गर्ने उनको भनाइ छ ।
