भरतपुर । भरतपुर महानगरपालिका वडा नं–२९, गाईघाटमा सातवटा सवारीसाधन एकापसमा ठोक्किँदा २१ जना घाइते भएका छन् ।
जिल्ला प्रहरी कार्यालय चितवनका प्रहरी नायब उपरीक्षक रवीन्द्र खनालका अनुसार शनिबार बिहान ७ः३० बजे उक्त दुर्घटना भएको हो । घाइतेहरूको चितवन मेडिकल कलेज, जनता केयर अस्पताल र नेसनल सिटी अस्पतालमा उपचार भइरहेको छ ।
मुग्लिनबाट नारायणगढतर्फ आउँदै गरेको ना८ख ६६२९ नम्बरको ट्रक र विपरीततर्फबाट जाँदै गरेको बा४ख ७४२० नम्बरको बस, बसको पछाडि ना ७ ख ९६०७ नम्बरको टेलर, टेलरपछाडि बागमती प्रदेश ०६–००१ ग ०४८४ नम्बरको इलेक्टिक माइक्रो, माइक्रोपछाडि ग २ ख १६२६ नम्बरको बस, बसपछाडि ना३च ३२५६ नम्बरको बलेरो र बलेरोपछाडि बिएबी ८४७० नम्बरको कार लहरैसँग ठोक्कएका हुन् ।
सवारी साधनहरू ठक्कर खाँदा घाइते भएकामध्ये १३ जनाको नेसनल सिटी अस्पतालमा, चार जना चितवन मेडिकल कलेज (सिएमसी)मा र चार जनाको जनता केयर अस्पतालमा उपचार भइरहेको प्रहरीले जनाएको छ ।
दुर्घटनास्थलमा जिप्रका चितवनबाट प्रहरी निरीक्षक लक्ष्मण केसीसहितको टोली खटिएको र थप विवरण आउन बाँकी रहेको प्रहरीले जनाएको छ ।
