भरतपुर । लायन्स क्लब इन्टरनेसनल डिस्ट्रिक ३२५ आरले भरतपुर–३, चितवनमा एक समारोहबीच प्रशासकीय भवन शिलान्यास गरेको छ । लायन्स अन्तर्राष्ट्रियका पूर्वनिर्देशक बालकृष्ण बुर्लाकोटीको प्रमुख आतिथ्यता एवम् एलसिआइएफ एरिया लिडर राजन लम्सालको विशिष्ट आतिथ्यतामा शिलान्यास समारोह सम्पन्न भएको हो ।
नेपालमा १५ वटा लायन्सका डिस्ट्रिक क्रियाशील छन् । जसमध्ये आफ्नै प्रशासकीय भवनको शिलान्यास गर्ने डिस्ट्रिक ३२५ आर पहिलो हो । हाल यस डिस्ट्रिकमा १८७ वटा लायन्स क्लबका चार हजार ४१० जना लायन सदस्य आवद्ध छन् ।
भवन निर्माण समितिका संयोजक तथा पूर्वडिस्ट्रिक गर्भनर सिद्धार्थलाल चुकेले प्रशासकीय भवन करिब दुई करोड रुपैयाँको लागतमा १८ महिनाभित्र सम्पन्न गर्ने लक्ष्य राखिएको बताए । सो कार्यका लागि हालसम्म करिब ४५ लाख रुपैयाँ सङ्कलन भइसकेको र बाँकी रकम पनि चाँडै सङ्कलन हुने विश्वास व्यक्त गरे । प्रतिलायन सदस्य तीन हजार रुपैयाँका दरले सहयोग सङ्कलन गर्ने निर्णय गरिसकेको जानकारी गराउँदै लागत रकम उठाउने लक्ष्य पूरा गर्न कुनै समस्या नरहेको उनको भनाइ थियो ।
इन्जिनियर लायन उमेश ढकालका अनुसार भवनको पहिलो तला कार्यालय प्रयोजनको रुपमा रहनेछ भने दोस्रो तलामा दुईवटा हल रहनेगरी नक्सा तयार गरिएको छ । भवन एक कट्ठा (२० धुर) जग्गामा निर्माण हुनेछ, जसमा १० धुर जग्गा लायन सदस्यहरूले खरिद गरेका हुन् भने बाँकी १० धुर जग्गा लायन बालगोपाल चुके परिवारले प्रदान गरेको हो ।
संस्थागत सुदृढीकरणमा कोसेढुङ्गा साबित हुने अपेक्षा गरिएका उक्त भवन निर्माणमा आफूहरुको पनि सहभागिताका लागि प्रमुखअतिथि बुर्लाकोटी र विशिष्टअतिथि लम्सालले भवन निर्माणका लागि जनही ५५ हजार ५५५ रुपैयाँ प्रदान गरेका थिए ।
भवन शिलान्यास कार्यक्रममा पूर्वडिस्ट्रिक गर्भनरहरू, लायन तथा लियो सदस्यहरूको उल्लेखनीय सहभागिता रहेको थियो । कार्यक्रम डिस्ट्रिक गर्भनर लायन नवराज सापकोटाको सभापतित्वमा सम्पन्न भएको थियो ।
