चितवन । चितवनको भरतपुर र नारायणगढ बजार क्षेत्रमा सञ्चालित केही स्पा सेन्टरमा प्रहरीले छापा हानेको छ । बुधबार अपरान्ह जिल्ला प्रहरी कार्यालय चितवनका प्रहरी नायब निरीक्षक जहरलाल स्याङतानको कमान्डमा खटिएको १० जना प्रहरी टोलीले एक महिलासहित आठ जनालाई नियन्त्रणमा लिएको हो ।
प्रहरी टोलीले स्पा तथा मसाज सेन्टरहरूमा अनुमतिबिना (दर्ता नगरी) सञ्चालन गरिएको, कोठामा क्युआर कोड राखिएको तथा अवैध गतिविधि हुने गरेको पाइएको जनाएको छ।
प्रहरीले नमस्ते किङ स्पा, कान्तिपुर स्पा, मुनस्टार हेल्थ केयर एण्ड स्पा, गुड हेल्थ स्पा, हेप्पी हेल्थ स्पामा छापा हानेको थियो । प्रहरीले छापा मार्ने क्रममा सञ्चालक, ग्राहक तथा स्टाफसमेत गरी जम्मा आठ जनालाई नियन्त्रणमा लिएको जिल्ला प्रहरी कार्यालय चितवनका प्रवक्ता रवीन्द्र खनालले जानकारी दिए । नियन्त्रणमा लिइएका व्यक्तिहरूमाथि आवश्यक अनुसन्धान भइरहेको उनले बताए ।
