भरतपुर । चितवन प्रहरीले अवैधरूपमा क्रिप्टोकरेन्सी कारोबार गरेको आरोपमा एक जनालाई पक्राउ गरेको छ । जिल्ला प्रहरी कार्यालय चितवनले जारी गरेको प्रेस विज्ञप्तिअनुसार पक्राउ पर्नेमा नवलपरासी (बर्दघाट सुस्तापूर्व) कावासोती नगरपालिका–१ स्थायी घर भई हाल भरतपुर महानगरपालिका–१० बस्दै आएका २४ वर्षीय बुद्धिसागर भुसाल रहेका छन् ।
प्रहरीका अनुसार जेठ १८ गते बेलुका करिब ७ः४५ बजे भुसालले विद्युतीय उपकरणमार्फत बिनान्स एप प्रयोग गरी अभौतिक मुद्रा (क्रिप्टोकरेन्सी) कारोबार गरिरहेको भन्ने सूचनाको आधारमा प्रहरी टोलीले उनलाई पक्राउ गरेको हो ।
उनको साथबाट मोबाइल फोन एक थान र नगद चार लाख ५० हजार रुपैयाँ बरामद गरिएको प्रहरीले जनाएको छ । पक्राउ परेका भुसालमाथि अभौतिक मुद्रासम्बन्धी कसुरमा चितवन जिल्ला अदालतबाट म्याद थप गरी थप अनुसन्धान भइरहेको छ ।
