२०८३ मंसिर ६ शनिबार
२०८३ मंसिर ६ शनिबार

रत्ननगर । बागमती प्रदेश सरकारका स्वास्थ्य तथा सामाजिक विकासमन्त्री गिरबहादुर तामाङले गुरुकुलमा अध्ययनरत बटुकहरूको स्वास्थ्य सुरक्षालाई प्रदेश सरकारले प्राथमिकतामा राखेको बताएका छन् ।

रत्ननगर–१ निपनीस्थित हरिहर मन्दिर तथा गायत्री वेदवेदाङ संस्कृत गुरुकुलमको स्थलगत निरीक्षण तथा अवलोकनका क्रममा मन्त्री तामाङले वैदिक सनातन धर्म, संस्कृति र संस्कृत भाषाको संरक्षणमा गुरुकुलले मह¤वपूर्ण योगदान पु¥याउँदै आएको बताए । उनले गुरुकुलका विद्यार्थीको स्वास्थ्य उपचारको जिम्मेवारीसमेत राज्यले लिनुपर्ने धारणा राखे ।

वैदिक सनातन धर्म, संस्कृति र भाषाको संरक्षणमा मठमन्दिर तथा गुरुकुलको भूमिका मह¤वपूर्ण रहेको उल्लेख गर्दै मन्त्री तामाङले यस्ता धार्मिक तथा शैक्षिक संस्थाको संरक्षण र विकासमा राज्यले ध्यान दिनुपर्ने बताए ।

नेपाल उद्योग वाणिज्य महासंघका केन्द्रीय सदस्य तथा रत्ननगर उद्योग वाणिज्य संघका अध्यक्ष शंकर गिरीको पहलमा मन्त्री तामाङलाई गुरुकुलको स्थलगत अवलोकन गराइएको हो । गिरीकै पहलमा मन्दिर परिसरमा हरिहर सदन भवन निर्माण भइरहेको छ ।

मन्दिर व्यवस्थापन समितिका अध्यक्ष निलकण्ठ पौडेलले मन्दिर तथा गुरुकुलले भोगिरहेका समस्या, आवश्यक पूर्वाधार र विकासका योजनाबारे मन्त्रीलाई जानकारी गराएका थिए । कार्यक्रममा गुरुकुलम व्यवस्थापन समितिका अध्यक्ष सोमप्रसाद भट्ट, प्राचार्य सुवास चालिसे तथा मन्दिरका पुजारी कुलदीप गौतमलगायतको उपस्थिति थियो ।

मन्दिरको एक बिघा जग्गाको पश्चिमतर्फ निर्माण भइरहेको हरिहर सदन भवनको डीपीआर पाँचतले रहेको छ । हाल तीन तला निर्माण गर्न बाँकी रहेको जनाइएको छ । भवन निर्माणका लागि प्रदेश सरकारको सामाजिक विकास मन्त्रालयमार्फत यसअघि चार करोड रुपैयाँ लगानी भइसकेको छ । तर, चालु आर्थिक वर्षमा थप बजेट विनियोजन नभएको जानकारी गराइएको थियो ।

गुरुकुलमा हाल कक्षा ६ देखि १२ सम्म ११० जना बटुक अध्ययनरत छन् । उनीहरूलाई अध्यापन गराउन नौ शिक्षक र चार कर्मचारी गरी १३ जना कार्यरत छन् ।

रत्ननगर । रत्ननगर नगरपालिकाले ‘करदाता सप्ताह २०८३’ को अवसर पारेर उत्कृष्ट करदाताहरूलाई सम्मान गरेको छ । नगरपालिकाले विभिन्न विधामा उत्कृष्ट कर तिर्ने व्यक्ति तथा संस्थालाई सम्मान गरिएको हो ।

सम्मानित हुनेमा सम्पत्ति करतर्फ रत्ननगर वडा नं–१४ का अनिशमान सिंह श्रेष्ठ (प्रतिनिधि बलराम घिमिरे) रहेका छन् । उनले एक लाख १३ हजार ४५१ रुपैयाँ सम्पत्ति कर दाखिला गरेका थिए ।

यस्तै, बहाल करतर्फ रत्ननगर वडा नं–१० का केशवप्रसाद पौडेल सम्मानित भएका छन् । उनले दुई लाख ३४ हजार ६६६ रुपैयाँ ७२ पैसा बहाल कर तिरेको नगरपालिकाले जनाएको छ ।

यसैगरी, व्यवसाय करतर्फ रत्ननगर वडा नं–१४ मा रहेको एस.वाई. प्यानल नेपाल लिमिटेड (प्रतिनिधि मनिष बानियाँ) सम्मानित भएका छन् । उक्त कम्पनीले ३ लाख ४१ हजार १ सय २७ रुपैयाँ व्यवसाय कर बुझाएको थियो ।

रत्ननगर नगरपालिकाका नगर प्रमुख प्रलाद सापकोटाको अध्यक्षतामा सम्पन्न कार्यक्रममा प्रमुख प्रशासकीय अधिकृत प्रकाश खनालको विशेष उपस्थिति रहेको थियो ।

कार्यक्रममा रत्ननगर–१० का वडाध्यक्ष एवं आर्थिक विकास समिति संयोजक कलाधर पौडेल, रत्ननगर–१२ का वडाध्यक्ष सुन्दरमणि सुवेदी, रत्ननगर उद्योग वाणिज्य संघका अध्यक्ष शंकर गिरी, नगर शिक्षा अधिकारी नारायण वाग्ले, महिला विकास अधिकृत दीपा घिमिरे, लेखा अधिकृत प्रदीप पौडेल, विभिन्न शाखागत कर्मचारी, व्यवसायी तथा स्थानीयको उपस्थिति रहेको थियो ।

रत्ननगर । चितवन रत्ननगर–८, चित्रसारीमा एकादशी मेला लागेको छ । थारू महिलाहरूले झाम्टा नाच प्रदर्शन गर्दै चित्रसेन बाबाको आह्वान गरी मेला सुरू भएको हो ।

हरिबोधनी एकादशीका अवसरमा उक्त मेला तीन दिनसम्म सञ्चालन हुनेछ । चित्रसेन बाबा मन्दिर संरक्षण समितिको अगुवाइमा आयोजना गरिएको मेलाको सुरुआत थारू महिलाहरूको झाम्टा नाचमार्फत चित्रसेन बाबाको आह्वान गरेर गरिएको समितिका अध्यक्ष आशाराम महतोले बताए ।

झाम्टा नाचपछि चित्रसेन बाबाको आह्वान गरी एकादशी मेला विधिवत् सुरूवात भएको उनले बताए । रातभर दियो बालेर पूजा आराधना गर्ने प्रचलन रहेको र यसबाट मनोकामना पूरा हुने विश्वास रहेको उनको भनाइ छ ।

चित्रसेन बाबालाई थारू राजा तथा भगवान् विष्णुको अवतारका रूपमा पुज्ने धार्मिक मान्यता छ । थारू समुदायले प्राचीनकालदेखि देवताका रूपमा श्रद्धापूर्वक पूजाआजा गर्दै आएका चित्रसेन बाबा पछिल्लो समय सबै समुदायको आस्थाको केन्द्र बनेका छन् । चित्रसेन बाबाको नामबाट चितवन जिल्लाको नामकरण भएको जनविश्वास रहिआएको छ ।

हरेक वर्ष कार्तिक शुक्ल हरिबोधनी एकादशीका दिन चित्रसेन बाबाको थान परिसरमा मेला लाग्ने गर्दछ । एकादशीको अघिल्लो साँझदेखि भोलिपल्ट साँझसम्म दर्शनार्थीको घुइँचो लाग्ने गर्दछ । यहाँ टाढाटाढाबाट भक्तजन पूजा तथा दर्शनका लागि आउने गर्दछन् ।

बुढी राप्ती नदीमा स्नान गरी चित्रसेन बाबाको थानमा पूजा गर्ने चलन छ । यहाँ गुरौ थारू पुजारीबाट पूजा हुने मन्दिर र ब्रह्मस्थानसमेत रहेको छ । मन्दिर संरक्षण समितिका सचिव नरिश्वर पुरीले चित्रसेन बाबाको पूजा थारू संस्कृतिसँग जोडिएको भए पनि सबै समुदायका लागि उत्तिकै मह¤वपूर्ण रहेको बताए ।

विसं २०५९ देखि समितिमार्फत मेला सञ्चालन गर्न थालिएको उल्लेख गर्दै प्रशासनसँग अनुमति लिएर भड्काउ गतिविधि नगरी मौलिक संस्कृति संरक्षण गर्ने उद्देश्यले मेला आयोजना हुँदै आएको उनले बताए ।

रत्ननगर नगरपालिका–८ का वडाध्यक्ष तथा मेला व्यवस्थापन समितिका संयोजक कृष्ण चौधरीले चित्रसेन मन्दिरमा लाग्ने एकादशी मेला मह¤वपूर्ण रहेको बताए । पहिले थारू समुदायको मन्दिरका रूपमा रहेको चित्रसेन बाबा मन्दिर अहिले सबै समुदायको साझा आस्थाको स्थल बनेको उनले बताए ।

मन्दिरमा सोमबार आरती हुने गरेको र थारू पुजारीबाट दैनिक पूजा आराधना हुँदै आएको छ । एकादशी मेलासँग जोडिएर आउने राउन्ड बत्ती र रिङ हान्ने खेलको आकर्षणका कारण पनि मेलामा भक्तजन आउने गरेका छन् ।

विगतका वर्षमा राउन्ड बत्ती र रिङ हान्ने खेल सञ्चालन हुँदै आएकोमा यस वर्ष प्रशासनले सीमितता तोकेका कारण १३ राउन्ड बत्ती र पाँच रिङ हान्ने खेल मात्र सञ्चालन गरिने उनले बताए ।

मन्दिर परिसरको बाटोमा भीडभाड नहोस् भनेर यसपटक परिसरभित्रै मेला सञ्चालन गरिने उनले जानकारी दिए । हरिबोधनी एकादशीका दिन व्रत बसेर चित्रसेन बाबाको दर्शन तथा पूजाआजा गर्दा मनोकामना पूरा हुने धार्मिक विश्वास छ ।

व्रत बसेका तथा दर्शन गर्न आएका भक्तजनले मेलामा पाइने फलफूल, उखु, सखरखण्डलगायत सामग्री किनेर घर लैजाने चलन छ । चित्रसेन बाबा मन्दिरमा करिब १२–१३ वर्षदेखि पुजारीका रूपमा सेवा गर्दै आउनुभएका भरत महतोका अनुसार यस स्थानलाई गाउँको ब्रह्मथानका रूपमा मान्ने गरिन्छ । यहाँ दर्शन तथा पूजाआजा गर्न टाढाटाढाबाट भक्तजन आउने र दर्शनका लागि दिनभर लामो लाइन लाग्ने गरेको छ ।

चित्रसेन बाबाप्रति भक्तजनको गहिरो विश्वास रहेको उल्लेख गर्दै उनले यहाँ भाकल गर्दा निःसन्तानले सन्तान प्राप्त गरेको, दुःख हटेको तथा हराएका मानिस भेटिएकोजस्ता अनुभव भक्तजनले सुनाउने गरेका छन् ।

चितवन । चितवनको अग्रणी तथा उत्कृष्ट सूचना प्रविधि शिक्षण संस्था ड्रिम्स कलेजका विद्यार्थीहरूले राष्ट्रियस्तरको प्रविधि प्रतिस्पर्धा कोडफेस्ट नेपाल–२०२६ मा उल्लेखनीय सफलता हासिल गर्दै कलेजसँगै चितवनको प्रतिष्ठा उच्च बनाएका छन् ।

कोडफेस्ट नेपाल–२०२६ अन्तर्गत स्नातक तह (ब्याचलर) समूहमा सहभागी ड्रिम्स कलेजका विद्यार्थीहरूले दोस्रो स्थान हासिल गरेका हुन् । विद्यार्थीहरूको कडा मेहनत, सिर्जनशीलता, नवीन सोच, प्राविधिक दक्षता तथा सामूहिक सहकार्यको परिणामस्वरूप प्राप्त यस उपलब्धिले कलेजले प्रदान गर्दै आएको गुणस्तरीय शैक्षिक तथा व्यावहारिक शिक्षाको प्रभावकारिता थप पुष्टि गरेको छ ।

यस सफलताले ड्रिम्स कलेजमा प्रविधि शिक्षा केवल पाठ्यपुस्तक र कक्षाकोठामा सीमित नरही व्यावहारिक सिकाइ, परियोजना निर्माण, नवप्रवर्तन तथा प्रतिस्पर्धात्मक क्षमता विकासमा केन्द्रित रहेको स्पष्ट पारेको छ ।

चितवनमा गुणस्तरीय, आधुनिक, व्यावहारिक तथा उद्योगमुखी सूचना प्रविधि शिक्षाको विकासमा महत्त्वपूर्ण भूमिका खेल्दै आएको ड्रिम्स कलेज विद्यार्थीहरूको पहिलो रोजाइको कलेज बन्ने लक्ष्यसहित अघि बढिरहेको छ । आधुनिक पूर्वाधार, सुविधासम्पन्न कम्प्युटर प्रयोगशाला, अनुभवी तथा दक्ष प्राध्यापक, विद्यार्थीमैत्री शिक्षण पद्धति र प्रविधिमैत्री सिकाइ वातावरण कलेजका प्रमुख विशेषता हुन् ।

कलेजले शैक्षिक ज्ञानसँगै व्यवहारिक सीप, सिर्जनशीलता, नेतृत्व क्षमता तथा व्यावसायिक दक्षता विकासका लागि विभिन्न अतिरिक्त शैक्षिक तथा प्राविधिक कार्यक्रम सञ्चालन गर्दै आएको छ ।

कोडफेस्ट नेपाल २०२६ मा प्राप्त सफलता ड्रिम्स कलेजको व्यावहारिक, नवप्रवर्तनमुखी तथा विद्यार्थी केन्द्रित शिक्षण दृष्टिकोणको महत्त्वपूर्ण उपलब्धिका रूपमा हेरिएको छ । प्रतियोगितामा उत्कृष्ट प्रदर्शन गर्ने टोलीको नेतृत्व टोली प्रमुख सन्तोष चापागाईंले गरेका थिए । टोलीका अन्य सदस्यमा दिपेश पौडेल, प्रशान्त ढकाल र आयुष तिमिल्सिना रहेका छन् ।

विद्यार्थीलाई वास्तविक सूचना प्रविधि क्षेत्रको आवश्यकता अनुरूप दक्ष बनाउने उद्देश्यले कलेजमा नियमित रूपमा विभिन्न प्रशिक्षण कार्यशाला, सघन सीप विकास कार्यक्रम, प्रविधि प्रतिस्पर्धा, परियोजनामा आधारित अध्ययन, उद्योग क्षेत्रका विज्ञसँग अन्तर्क्रिया तथा नवीनतम उद्योगमुखी पाठ्यक्रम सञ्चालन हुँदै आएका छन् ।

विद्यार्थीलाई आफ्नो ज्ञान व्यवहारमा उतार्ने, नयाँ प्रविधि सिक्ने, समूहगत कार्य गर्ने तथा वास्तविक समस्याको समाधान विकास गर्ने अवसर प्रदान गरिँदै आएको कलेजले जनाएको छ । साथै, इन्टर्नसिप तथा रोजगारी सहजीकरण कार्यक्रममार्फत विद्यार्थीहरूको करियर विकास र रोजगारमुखी क्षमता अभिवृद्धिमा समेत विशेष जोड दिइँदै आएको छ ।

विद्यार्थीका नवीन विचारलाई वास्तविक परियोजना, उत्पादन तथा उद्यमशीलतामा रूपान्तरण गर्ने उद्देश्यले कलेजले नवप्रवर्तन प्रवर्द्धन केन्द्रसमेत स्थापना गरेको छ । यसमार्फत विद्यार्थीहरूमा नवप्रवर्तन, अनुसन्धान, स्टार्टअप संस्कार तथा उद्यमशील सोचको विकास गर्ने लक्ष्य राखिएको कलेजले जनाएको छ ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।