चितवन । चितवन जिल्लामा डेंगु र स्क्रब टाइफसका बिरामीहरू बढ्न थालेका छन् । जनस्वास्थ्य कार्यालय, चितवनले साउन १ गतेदेखि साउन २८ गते सम्मको दैनिक अद्यावधिक तथ्याङ्क सार्वजनिक गर्दै जिल्लाभित्र र बाहिरका गरी हालसम्म ३४ जनामा स्क्रब टाइफस र चार जनामा डेंगु सङ्क्रमण पुष्टि भएको जनाएको छ ।
कार्यालयका अनुसार सङ्क्रमण परीक्षण गरिएका कुल २११ जनामध्ये ३४ जनामा स्क्रब टाइफस पोजेटिभ देखिएको छ भने १७८ जनाको परीक्षण गर्दा चार जनामा डेंगु सङ्क्रमण पुष्टि भएको छ ।
जिल्लाका स्थानीय तहहरूको विवरण हेर्दा भरतपुर महानगरपालिकामा स्क्रब टाइफसको जोखिम बढी देखिएको जनस्वास्थ्य कार्यालयका सूचना अधिकारी राम केसीले जानकारी दिए । भरतपुरमा एक पुरुष र चार महिला गरी कुल पाँच जनामा स्क्रब टाइफस सङ्क्रमण पुष्टि भएको छ । यस्तै, रत्ननगर नगरपालिकामा एक जना पुरुषमा स्क्रब टाइफस भेटिएको छ ।
डेंगु सङ्क्रमणतर्फ भने कालिका नगरपालिकामा एक जना महिला र इच्छाकामना गाउँपालिकामा एक जना पुरुष गरी जिल्लाभित्रका दुई जनामा सङ्क्रमण पुष्टि भएको छ । खैरहनी, माडी र राप्ती नगरपालिकामा भने हालसम्म डेंगु र स्क्रब टाइफस दुवैको सङ्क्रमण शून्य रहेको छ ।
चितवनका स्वास्थ्य संस्थाहरूमा उपचारका लागि अन्य जिल्लाबाट आएका बिरामीहरूमा सङ्क्रमणको दर उच्च देखिएको छ । अन्य जिल्लाका ११ पुरुष र १७ महिला गरी कुल २८ जनामा स्क्रब टाइफस सङ्क्रमण पुष्टि भएको छ भने दुई जना पुरुषमा डेंगु भेटिएको छ ।
पछिल्लो २४ घन्टामा जिल्लामा डेंगुका दुई जना (कालिका एक) र अन्य जिल्लाका १० तथा स्क्रब टाइफसका दुई जना (अन्य जिल्लाका) नयाँ बिरामी थपिएका छन् ।
सूचना अधिकारी केसीका अनुसार अहिलेको मौसम डेंगु र स्क्रब टाइफसको संक्रमण फैलिने सिजन हो । वर्षायाम सुरू भएसँगै कीटजन्य रोगहरूको जोखिम बढ्ने भएकाले आफ्नो वरपरको वातावरण सफा राख्न, पानी जम्न नदिन र लामखुट्टे तथा माइटको टोकाइबाट बच्न जनस्वास्थ्य कार्यालय चितवनले आग्रह गरेको छ ।
