भरतपुर । चितवन उद्योग वाणिज्य संघले भरतपुर–१०, चौबिसकोठीमा रहेको मेदान्त डेन्टल जोन प्रालिसँग दन्त स्वास्थ्य सेवामा विशेष छूट तथा सहुलियत प्रदान गर्नेसम्बन्धी द्विपक्षीय समझदारी पत्रमा हस्ताक्षर गरेको छ ।
व्यावसायिक सामाजिक उत्तरदायित्व र सदस्य लक्षित कल्याणकारी कार्यक्रमअन्तर्गत सम्झौता भएको हो । यस सम्झौताअनुसार चितवन उद्योग वाणिज्य संघमा आबद्ध सदस्य एवम् कर्मचारीहरू तथा उनीहरूका परिवारका सदस्यहरूलाई समेत मेदान्त डेन्टल जोनले दन्त उपचार सेवामा छूट सेवा उपलब्ध गराउनेछ ।
चितवन उद्योग वाणिज्य संघको सदस्य एवम् कर्मचारीका परिवारका सदस्यहरुलाई मेदान्त डेन्टल जोन प्रालिले आफ्नो क्लिनिक/अस्पतालमा उपलब्ध गराउने सम्पूर्ण प्रकारका साना तथा ठूला दन्त उपचार सेवाहरूमा २० प्रतिशतदेखि २५ प्रतिशतसम्म छूट प्रदान गर्ने सम्झौतामा उल्लेख छ ।
छूट सेवा लिनका लागि चितवन उद्योेग वाणिज्य संघका सदस्य एवम् कर्मचारीले मेदान्त डेन्टल जोन प्रालिमा उपचारका लागि दर्ता वा बिलिङ गराउने समयमा चितवन उद्योग वाणिज्य संघबाट जारी गरिएको आधिकारिक परिचय पत्र पेश गर्नुपर्ने संघका कार्यक्रम अधिकृत गणेश सुवेदीले जानकारी गराए ।
उक्त समझदारी पत्रमा चितवन उद्योग वाणिज्य संघको तर्फबाट कार्यकारी निर्देशक निलबहादुर के.सी तथा कार्यसमिति सदस्य एवम् स्वास्थ्य समिति संयोजक प्रविन आचार्यले हस्ताक्षर गरेका छन् । मेदान्त डेन्टल जोन प्रालिको तर्फबाट प्रबन्ध निर्देशक आरती आचार्य र म्यानेजर गंगाराम गौतमले हस्ताक्षर गरेका थिए ।
हस्ताक्षर गर्ने कार्यक्रममा चितवन उद्योग वाणिज्य संघका अध्यक्ष चिरञ्जीवी सुवेदी, वरिष्ठ उपाध्यक्ष राजेन्द्र ओली, कार्यकारी निर्देशक निलबहादुर केसी, कार्यसमिति सदस्य एवम् स्वास्थ्य समिति संयोजक प्रविन आचार्य र मेदान्त डेन्टल जोनबाट प्रबन्ध निर्देशक आरती आचार्य, म्यानेजर गङ्गाराम गौतमको सहभागिता रहेको थियो ।
