रत्ननगर । रत्ननगर नगरपालिकाले मौरीपालक किसानलाई उत्पादनमा आधारित प्रोत्साहन अनुदान प्रदान गरेको छ । महको उत्पादन बढाउन ५९ जना किसानलाई १८ लाख रूपैयाँ अनुदान वितरण गरिएको कृषि शाखा प्रमुख प्रविन लामाले जानकारी दिए ।
सोमबार आयोजित एक औपचारिक कार्यक्रममा किसानले उत्पादनका आधारमा प्राप्त गरेको रकमको चेक हस्तान्तरण गरिएको छ । सो नगरपालिकाले नेपालमै पहिलोपटक मह उत्पादनमा अनुदान प्रदान गरेको दाबी गरेको छ । अनुदान पाउनेमा ४ वटा घारदेखि १६२ घारसम्म मौरी पालेका किसान रहेका छन् । सबैभन्दा धेरै रत्ननगर वडा नं–१३ का किसान शंकर भट्टले १ लाख तीन हजार ५५८ रूपैयाँ अनुदान पाएका छन् । उनको १६२ घार मौरी रहेका छन् ।
मौरीपालक किसानलाई उत्पादनमा आधारित अनुदान वितरणका लागि नगरपालिकाले कार्यविधि नै बनाएको छ । अनुदानलाई व्यवस्थित र दीर्घकालीनरुपमा अगाडि बढाउन कार्यविधि बनाएरै किसानलाई सम्बोधन गरिएको लामाले बताए । उत्पादनका आधारमा प्रतिकिलो २५ रूपैयाँ तथा प्रतिघार ५२५ रूपैयाँ अनुदान प्रदान गरिएको छ । ‘काम गर्ने र उत्पादन गर्ने किसानलाई अनुदान दिएका छौैँ’, उनले भने, ‘यसो गर्दा वास्तविक र व्यावसायिक किसानलाई राहत मिल्ने छ ।’
यसअघि रत्ननगर नगरपालिकाले दूधमा मात्र उत्पादनमा आधारित अनुदान दिँदै आएको छ । दूधमा मात्र वार्षिक ५० लाख अनुदान दिँदै आएको सो नगरपालिकाले कृषि र पशुपालनमा वार्षिक ४ करोड बढी अनुदान वितरण गर्दै आएको छ ।
कार्यक्रममा उपमेयर यादवप्रसाद पाठकले उत्पादन र यान्त्रिकीकरणमा अनुदानले मात्र कृषि र पशुपालनको विकास हुने बताए । ‘चार वर्षमा १६ करोड रूपैयाँ अनुदान दियौँ’, उनले भने, ‘तर कसैले पायौँ भन्दैनन् । नामको मात्र किसानले अनुदान पाउँदा अनुदान शब्द नै आलोचित बन्यो, त्यसैले रत्ननगरले कामका किसानलाई अनुदान दिन सुरू गरेको छ ।’
प्रमुख प्रशासकीय अधिकृत प्रकाश खनालले किसानको संरक्षण गर्दै महको उत्पादन बढाउन उत्पादनमा आधारित अनुदान प्रदान गरिएको बताए । स्थानीय सरकारले दिएको अनुदान रकम सही ठाउँमा प्रयोग गर्न आग्रह गर्दै उनले यसको सही सदुपयोग गर्न आग्रह गरे ।
जिल्ला कृषि विकास कार्यालय चितवनका प्रमुख झलकनाथ कँडेलले राज्यले दिने अनुदानले किसानलाई व्यावसायिक बनाउन मद्दत गर्ने बताए । मौरीपालक विकास केन्द्र भण्डाराका प्रमुख सुजन अम्गाईंले रत्ननगर नगरपालिकाले प्रदेशमै पहिलोपटक मौरीमा अनुदानमा आधारित अनुदान वितरण गरेको बताए ।
नेपाल मौरीपालक महासंघका निवर्तमान अध्यक्ष शिव पौडेलले उत्पादनमा आधारित अनुदानले मात्र किसानको हित हुने बताए । ‘यो वैज्ञानिक छ’, उनले भने, ‘यसो गर्दा कृषि र पशुपालनको विकासले गति लिन्छ ।’ आर्थिक विकास समितिका संयोजक कलाधर पौडेलको अध्यक्षतमा भएको कार्यक्रम कृषि अधिकृत संयोग पौडेलले सञ्चालन गरेका थिए ।
